भांगरभूंय | प्रतिनिधी
पर्यटन, फार्मसी, उद्देग वाठारांत २ लाख नोकर्यो उपलब्ध
पणजी, प्रतिनिधी : पर्यटन, फार्मसी, आयटी तशेंच हेर उद्देगां मदीं वट्ट २ लाख नोकर्यो उपलब्ध आसात. हाका लागून गोंयांत आतां कोणूच बेकार उरपाक शकना. विद्यार्थ्यांक फुडाराक योग्य नोकरी मेळपा खातीर शिक्षकांनी विद्यार्थ्यांक करीयरचें मार्गदर्शन दिवपाची गरज आसा, अशें मुख्यमंत्री डॉ. प्रमोद सावंत हांणी सांगलें.
संवसारीक पर्यटन दिसा निमतान समग्र शिक्षा अभियान आनी शिक्षण खातें हांच्या जोड पालवान भ्रमण कार्यावळीचें आयोजन केल्लें. हे कार्यावळींत मुखेल सोयरे म्हूण डॉ. सावंत उलयताले. कार्यावळीक शिक्षण संचालक शैलेश झिंगडे, शिक्षण सचिव प्रसाद लोलयेंकार आनी विद्यार्थी हाजीर आशिल्ले.
ह्या वेळार पॅरीस ऑलिंपिकात पदक मेळयल्ल्या मनु भाकर हिचो मुख्यमंत्र्यांनी भोवमान केलो.
एका वेळार खण उद्देग हो गोंयचो मुखेल वेवसाय आशिल्लो. ही सुवात आतां पर्यटन उद्देगान घेतल्या. पर्यटन उद्देगांत नोकरेच्यो बर्योच संदी उपलब्ध आसात. हाचे खातीर सरकारान आयटीआय तशेंच हेर संस्थांनी हॉस्पिटेलीटी आनी हेर संबंधीत अभ्यासक्रम सुरू केल्यात. डीश धुवपी गोंयकार ताज सारख्या हॉटेलाचो उपाध्यक्ष जावपाक शकता, ही गजाल दरेकी तरणाट्याक उर्बा दिवपी आसा. धावी, पदवीधर वा हेर कुशळटाय आशिल्लो तरणाटो हॉटेलांत नोकरी करपाक शकता.
गोंयचें पर्यटन आतां दर्यादेगां पुरतें मर्यादीत उरूंक ना. पर्यटक ध्यानधारणा करपाक येवपाक लागल्या. हाका लागून आध्यात्मीक पर्यटन सुरू जालां. आयुश हॉस्पिटलांत उपचार घेवपा खातीर पर्यटक येतात. हातुंतल्यान वैजकी पर्यटन सुरू जालां. पर्यटन गायड हो वेवसाय आतां वाडत आसा. मोपा विमानतळ तशेंच मुळाव्या सुविधांक लागून कार्यावळींचो आंकडो वाडत आसा. हातुंतल्यान नोकरेच्यो संदी निर्माण जातात. ह्या संदींचो लाव घेवचो, असो उलो डॉ. प्रमोद सावंत हांणी मारलो
खाजगी विद्यापीठांक विरोध नाका
करीयर घडोवपी अभ्यासक्रम सुरू करपाच्या हेतान गोंयांत आता खासगी विद्यापीठां स्थापन जातलीं. हाचे खातीर ४ खासगी विद्यापीठांनी प्रस्ताव धाडला. विद्यापीठ तशेंच बर्या प्रकल्पाक विरोध करपाक जायना, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
