भांगरभूंय | प्रतिनिधी
14 वर्सांत पयलेच खेपे सगल्यांत चड बादीत 25 ते 34 पिराये गटांतले
पणजी: गोंयांत एचआयव्ही तरणाट्यां मदीं पावलो. 2009 ते 2022 मजगतीं सगल्यांत चड एचआयव्ही बादीत हे 35 ते 49 वर्सा पिराये गटांतले आशिल्ले. पूण 2023 वर्सा 14 वर्सांत पयलेच फावटी सगल्यांत चड बादीत 25 ते 34 वर्सा पिराये गटांतले सांपडल्यात. 2009 ते 2022 चे तुळेन 2023 वर्सा 15 ते 24 वर्सा पिराये गटांतले एचआयव्ही बादितांची संख्याय चड आशिल्ली. भलायकी खात्यांतल्या वरिश्ठ अधिकाऱ्यांनी ही म्हायती दिल्या.
2023 वर्सा वट्ट 260 एचआयव्ही बादीत सांपडिल्ले. हातूंतले 97 बादीत (37.3 टक्के) हे 25 ते 34 वर्सा पिराये गटांतले आशिल्ले. 85 बादीत (32.7 टक्के) 35 ते 49 वर्सा पिराये गटांतले, जाल्यार 32 बादीत (12.3 टक्के) 15 ते 24 वर्सा पिराये गटांतले आशिल्ले. हाचोच अर्थ 2023 वर्सा राज्यांतली एकूण बांदितां पैकी सुमार 50 टक्के बादीत तरणाटे समजुपी 15 ते 34 वर्सा पिराये गटांतले आशिल्ले.
असुरक्षीत लिंगीक संबंदाक लागून प्रमाण वाडलें
गोंयांत 2009 ते 2022 मेरेन असुरक्षीत लिंगीक संबंदांतल्यान एचआयव्हीची लागण जावपाचें प्रमाण हें 90 ते 96 टक्क्यां मजगतीं आशिल्लें. 2023 वर्सा हें प्रमाण 14 वर्सांतलें सगल्यांत चड म्हणल्यार 97.7 टक्के इतलें आशिल्लें. भलायकी अधिकाऱ्यांनी सांगलें की, फाटल्या कांय वर्सांत विवीध प्रकारच्या डेटींग अॅपाची संख्या वाडल्या. ह्या अॅपा वरवीं अनवळखी व्यक्ती बरोबर लिंगीक संबंद दवरतात. तरणाट्यां मदीं एचआयव्हीची लागण वाडपाचें हेंवूय एक कारण आसूंक शकता. अॅपाच्या योग्य वापरा विशीं खात्या वतीन तरणाट्यां मदीं जागृताय करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
