भांगरभूंय | प्रतिनिधी
भांगरभूंय । खबरां मेज
पणजीः गोंयांत पियेवपाच्या उदकाचो उणाव जाल्ल्या लोक त्रासांत आसतना मुख्यमंत्री डॉ प्रमोद सावंत मात कर्नाटकांत वेंचणूक प्रचारांत व्यस्त आसात अशी टिका काँग्रेस पक्षान केल्या. माया म्हयन्यांत धरणांतल्या उदकाची पातळी सामकी कमी जातली तेन्ना परिस्थिती आनीकूय वायट जातली अशें प्रदेश काँग्रेस समितीचो उपाध्यक्ष सुनील कवठणकार हांणे पणजे काँग्रेस हावसांत घेतिल्ले पत्रकार परिशदेंत सांगलें.
पोरूं उदकाचो उणाव जाल्लो ते्न्ना कांय लोकांक उदकाच्या एक टॅन्करा खातीर दोन हजार रुयये दिवचे पडिल्ले. अंदू व्हो दर एक हजारांचेर पावपाक शकता. टॅन्कराचें उदक विकतें घेवाक साबार लोकांक परवडना. हे समस्येचेर उपाय काडपाचें सोडून मुख्यमंत्री शेजारच्या राज्यांत वेंचणूक प्रचार करीत फिरता असो आरोप कवठणकारान केलो. नळांक उदक येना हाचे वयल्यान भाजपाची ‘हर घर जल’ येवजण फेल जाल्या. फुडाराक लोकांक तांच्या घरगुती अर्थीक वेवस्थापनांत उदका टॅन्करा खातीर पयशांची तजवीज करची पडटली असो थोमणो कवठणकारान मारलो.
फाटल्या धा वर्सा सावन भाजप सरकार चोवीस वरां उदका पुरवण करपाचें आस्वासन दित आसा. डबल इंजीन सरकारा आसून लेगीत लोकांक दिल्लें उतराक पाळो दिवपाक ते अपशीं थारलां. गिमाळ्यांत उदकाचो वापर वाडटा हें खबर आसून लेगीत सरकार हे समस्येचेर तोडगो काडपाक अपेशी थारलां. हाचे वयल्यान उदका पुरवणे विशीं मुख्यमंत्री गंभीर ना हें दिसून येता अशें ताणी सांगलें. बायलांक उदका खातीर त्रास काडचे पडटात अश्या वेळार भाजपाचें नारी शक्तीचें आस्वासन फट थारता अशेंय मत तांणी उक्तायलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
