भांगरभूंय | प्रतिनिधी
पेडणें, प्रतिनिधी ः मांद्रेंतल्या ओशो हीलिंग सेंटरांतल्यान बेपत्ता जाल्ली आरती गोपाल हामल (36) ही नेपाळी तरणाटी शिवोलें इश्टिणी वांगडा मेळ्ळी. नेपाळांतल्या धनगढीचे महापौर गोपाल हामल हांची ती धूव. तिच्या सोयऱ्यांनी कागाळ केल्या उपरांत फकत कांय वरां भितर गोंय पुलिसांनी तिचो सोद लायलो.
सोमारा 25 तारखेक रातच्या 9.30 वरां सावन आरती बेपत्ता आशिल्ली. काल (26 मार्च) तिच्या सोयऱ्यांनी पुलिशेंत कागाळ केल्या उपरांत सोद सुरू केल्लो. मांद्रे ओशोच्या ध्यान केंद्रांत वांटेकार जावपाक गेल्ल्या आरती कडेन कोणाचोच संपर्क जाय नाशिल्लो. देखून बापायन काठमांडूंतल्या भारतीय दूतावासांतल्यान गोंय पुलिसां कडेन संपर्क केलो. ‘म्हजे चलयेक सोदपाक मजत करात’ अशी विनंती महापौर गोपाल हामल हांणी फेसबूका वयल्यान केल्ली.
मजगतीं तिची धाकली भयण आनी भावोजी तिका सोदपाक गोंयांत पाविल्ले. तांणी पुलिशेंत कागाळ केल्या बरोबर पुलिसांनी नेटान चवकशी करपाक सुरवात केली. उपरांत कांय वरां भितर ती शिवोलेंत मेळ्ळी. ती रातच्या वेळार शिवोलें हांगा इश्टिणी वांगडा आशिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
