गोंयांत अॅम्ब्युलन्सींत जल्मली चली, घडणूक सप्टेंबर 2023 तली

भांगरभूंय | प्रतिनिधी

पणजी, बातमीदार ः सगळ्याच दुयेंती खातीर 108 अॅम्ब्युलन्स गरजेचीं. दीस- रात गरजेच्या वेळार धावून येवपी ही जीवनदायिनी आतां ‘जन्मदायिनी’ जाल्ल्याचें मोल्यांतले एके घडणुकेंतल्यान स्पश्ट जालां. अॅम्ब्युलन्स आपत्कालीन वैजकी तंत्रज्ञ पुंडलीक सुतार आनी ड्रायव्हर राजेश गांवकार हांणी दाखयल्ल्या धाडसाक लागून अॅम्ब्युलन्सांतच एके बायलेची सुरक्षीतपणान प्रसुती जाली. तिणें एके चलयेक जल्म दिलो.
प्रसूती म्हळ्यार भुरग्याचो जल्म आनी आवयचो पुनजल्म अशें मानतात. कारण, ही स्थिती खूब नाजूक आसता. देखून तज्ञ दोतोरांक खूब जतनाय घेवची पडटा. पूण, केन्ना केन्ना परिस्थिती इतली वायट आसता की तज्ञ दोतोरा कडेन पावपाक कळाव जाता. अशीच परिस्थिती मोल्यांचे प्रेमलता हे गुरवार बायलेचेर आयल्ली.

17 सप्टेंबर 2023 दिसाची ही गजाल. पोटांत दुखता म्हणून प्रेमलता तळमळपाक लागली. कुटुंबान रोखडेच 108 अॅम्ब्युलन्सीक म्हायती दिली. म्हायती मेळटाच ईएमटी पुंडलिक सुतार आनी ड्रायव्हर राजेश गांवकार 108 अॅम्ब्युलन्सांतल्यान मोल्यां वचपाक भायर सरले. वाटेर जायत्यो आडमेळीं, येरादारी हुंपून अॅम्ब्युलन्स बायलेच्या घरा पावली. पूण तो मेरेन बायलेच्या पोटांत खूब दुखपाक सुरवात जाल्ल्याचे सुतार हाच्या लक्षांत आयलें. देखून तिका हॉस्पिटलांत व्हरप लेगीत कठीण आशिल्लें. ते वेळार आवय आनी भुरग्यांक वाचवपाचें व्हडलें आव्हान तांचे मुखार आशिल्लें. परिस्थितीची गंभीरताय ताणें वळखली आनी रोखडेंच तांणी अॅम्ब्युलन्सांत बायलेचेर उपचार करपाक सुरवात केली. रोखडेंच अॅम्ब्युलन्सांत प्रसुतीची तयारी करपाक लागले. हातूंत ड्रायव्हर राजेश गांवकार हांणें ताका मजत केली. निमाणें 7.49 वरांचेर प्रेमलताची 108 अॅम्ब्युलन्सीत सुरक्षीतपणान डिलिव्हरी जाली. तिणें निरोगी भुरग्याक जल्म दिलो. ते उपरांत नवजात (चली) आनी तिचे आवयक फोंड्याच्या उपजिल्हो हॉस्पिटलांत दाखल केले. थंय दोतोरांनी पुराय तपासणी केली भुरगे आनी आवय दोगूय बरी आशिल्ली. आतां हें भुरगें पांच म्हयन्यांचें जालां.

ह्या वेळार ईएमटी पुंडलीक सुतार आनी ड्रायव्हर राजेश गांवकार हांणी दाखयल्ली तयारी खऱ्या अर्थान तोखणायेची आसा. हे खातीर भलायकी मंत्री विश्वजीत राणे हांणी दोगांयची तोखणाय केल्या.