भांगरभूंय | प्रतिनिधी
कोलवाळे अपघातांत घोव – बायलेक मरण
कर्नाटकाच्या दुबावीत ट्रक चालकाक अटक
ट्रकाचो फाटलो टायर फुटिल्ल्यान अपघात
भांगरभूंय । प्रतिनिधी
पेडणें: गोंयांत अपघाची माळ चालूच आसा. धारगळे म्हाखाजन वाठारांतल्या राष्ट्रीय महामार्ग 66 चेर सोमारा सकाळीं जाल्ल्या भिरांकूळ अपघातांत साळांतल्या मदल्या वाड्या वयलीं घोव-बायल सोंपलीं. ट्रक आनी स्कुटर हांचे मदीं जाल्ल्या ह्या अपघातांत रामचंद्र (रामा) चंद्रकांत राऊत (63) आनी तांची घरकान्न रेश्मा राऊत (53) हांकां मरण आयलें. शेनवारा कोलवाळे राष्ट्रीय मार्ग हुपतना एके स्कुटरीक मोटारीचो धपको बसून दुचाकी चालकाक मरण आयिल्लें. शेनवाराच कुंकळ्ळी वाठारांत आपअपघातांत एत मोटार चालक जखमी जाल्लो. ताचेर उपचार चालू आसतना आयतारा ताका मरण आयिल्लें. आयतारा धारबांदोडें वाठारांत दोन दुचाकींचो अपघात जावन 69 वर्सां पिरायेचे व्यक्तीक मरण आयिल्लें. तशेंच आयतारा फांतोडेर कळंगूटे मोटार आनी दुचाकी हांचे मदीं अपघात जावन एका टुरिस्ट पुलीस कॉन्स्टेबलाक मरण आयिल्लें. फाटल्या साडेपांच म्हयन्यांत रस्तो अपघातांत 122 जाणांक मरण आयलां.
सोमारा जाल्ल्या अपघाताचे चड म्हायती प्रमाण, सकाळींचंद्रकांत आनी रेश्मा हें जोडपें कामां निमतान पेडण्यां गेल्लीं. घरा परततना ही घडणूक घडली. जीए 03 व्ही 8773 नंबराचो काँक्रीट पावडरान भरिल्लो ट्रक आनी जीए 04 एम 8191 नंबराची स्कुटर म्हापशें वटेन वताली. धारगळे म्हाखाजन वाठारांत पावताच ट्रकाचो फाटलो टायर फुटिल्ल्यान चालकाचें गाडये वयलें नियंत्रण गेलें. उपरांत ट्रकान मुखार वचपी स्कुटरीक नेटान धपको दिलो. धपक्यान दुचाकी ट्रका पोंदां सांपडिल्ल्यान रामचंद्र आनी रेश्मा राऊत हांकां मरण आयलें.
हे घडणुकेची म्हायती मेळटाच पेडणें पुलिसांनी बेगोबेग घडणुके सुवातेर धांव घेतली. अपघाताक लागून राष्ट्रीय महामार्गाचेर कांय वेळ येरादारीची कोंयडी जाल्ली.
रामचंद्र हे कदंब म्हामंडळांतल्यान कंडक्टर पदा वयल्यान निवृत्त जाल्ले. तांच्या फाटल्यान दोन आंकवार पूत, भाव, भावजय, पुतणयो असो परिवार आसा. ते साळ गांवांतल्या समाजीक आनी धर्मीक कार्यांत वांटेकार जाताले. तांच्या अचकीत वचपांत पुराय गांवांत दुख्खाचें वातावरण पातळ्ळां.
ह्या प्रकरणांत दुबावीत ट्रक चालक लक्षदीप चलवाडी (23. मूळ रा. कर्नाटक, सध्या पेडें म्हापशें रावपी) हाका पेडणें पुलिसांनी अटक केल्या. मजगतीं, राऊत जोडप्यांच्या कुडींचेर जीएमसींत पोस्टमार्टम केला आनी गरजेच्यो वैजकी तशेंच कायदेशीर प्रक्रिया पुराय केल्यात. ह्या प्रकरणांत पुलीस उपनिरिक्षक प्रवीण सिमेपुरुषकार हांच्या मार्गदर्शना खाला फुडलो तपास चालू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
