भांगरभूंय | प्रतिनिधी
पणजी, बातमीदार ः वेर्णेंच्या इंडिको रिमेडीज हे फार्मा कंपनीन महाराष्ट्रांतल्या बोयसरांत (पालघर) भरती करपा खातीर ‘वॉक इन इंटरव्ह्यू’ जायरात उजवाडायल्या, असो आरोप करून गोवा फॉरवर्ड आनी आरजी पक्षान हाचो निशेध केला. ही जायरात फाटीं घेतली ना जाल्यार आंदोलन करपाची शिटकावणी आमदार विजय सरदेसाय हांणी दिल्या. तर, भाजपा सरकारान गोंयांतल्यो नोकऱ्यो परकी लोकांक विकल्यात असो आरोप आरजी फुडारी मनोज परब हांणी केला.
इंडिको फार्मा कंपनीन वेर्णाच्या आपल्या प्लांट 2 खातीर अधिकारी आनी कार्यकारी अधिकारी पदाची जायरात जाहीर केल्या. हाचे प्रमाण क्वालिटी अॅश्यूरन्स, क्वालिटी कंट्रोल, मायक्रोबायलॉजी आनी प्रोडक्शन ही पदां भरतले. हे खातीर 25 मेंक बोयसर हांगा मुलाखती जातल्यो. गोंयांतली कंपनी महाराष्ट्रांत नोकरभरती कित्याक करता असो प्रस्न दोनूय राजकी पक्षांनी उपस्थित केला.
इंडिको कंपनी गोंयच्या तरणाट्यांक मुद्दाम संद दिनात असो आरोप आमदार सरदेसाय हांणी ‘एक्स’ वयल्यान केला. गोंयांत बेकारीचें प्रमाण राश्ट्रीय सरासरी परस चड आसा. अशें आसून लेगीत ह्या कंपनींक राज्या भायल्या लोकांक कामार घेवपाक परवानगी दितात. हें विशीं विधानसभेंत आनी भायरय आवाज काडलो. त्या वेळार हांतूत लक्ष घालपाचें उतर दिल्लें. मुख्यमंत्री डॉ. प्रमोद सावंत हांणी हस्तक्षेप करपाची गरज आसा. गोंयच्या लोकांक फायदो जायना अशे उद्देग गोंयांत हाडून कांयच फायदो ना अशें तांणी म्हणलें.
मनोज परब हांणीय खर टिका केल्या. गोंयांत कंपनी आनी नोकऱ्यो महाराष्ट्रांत. गोंयांतल्या भाजपा सरकारान राज्यांतल्यो नोकऱ्यो परकी लोकांक विकल्यात. नोकऱ्यांनी थळाव्या लोकांक आरक्षण दिवपाचें आमचें कडेन कसलेंच धोरण ना. भाजपा खातीर फकत देणगी आनी इलेक्ट्रॉल बाँड म्हत्वाचे असो गंभीर आरोप श्री. परब हांणी केलो.
गोवा फॉरवर्ड कडल्यान मुखेल सचीवाक पत्र
हे संबंदी आमदार विजय सरदेसाय हांणी मुखेल सचीव पुनीत कुमार गोयल हांकां पत्र बरोवन खाजगी क्षेत्रांत थळाव्या लोकांक 80 टक्के आरक्षण दिवपाची मागणी केल्या. अशा कंपनीं आड खर भुमिका घेवची अशीय मागणीय सरदेसाय हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
