गोंयांतल्या इनक्युब इथिकल्स कंपनी खातीर पुण्यां मुलाखती
भांगरभूंय | प्रतिनिधी
मडगांव, प्रतिनिधी ः गोंयांतल्या फार्मा कंपनींनी नोकऱ्यां खातीर हेर राज्यांत मुलाखती घेवपाचें काम चालूच आसा. निशेध जाले उपरांत इंडोको फार्मान भुयसरांतल्यो मुलाखती रद्द केल्यो. आतां पुणें (महाराष्ट्र) हांगा इनक्युब इथिकल्स कंपनी कडल्यान मुलाखती घेवप सुरू आसात. ते खातीर गोंयकारांक नोकऱ्यां पसून पयस दवरपाचे हें प्रकार बंद करपा खातीर योग्य धोरणाची गरज आसा अशें मत गोवा फॉरवर्डान उक्तायलां. सरकारान तशें धोरण करचें अशी मागणी तांणी केल्या.
गोंयांतल्यो फार्मा कंपन्यो गोंयकार तरणाट्यांक नोकरी दिवपाक सोदनात. गोंयांत बेरोजगारीचे प्रमाण वाडत आसतना लेगीत अशें प्रकार चालू आसात. बुधवारा गोवा फॉरवर्ड आनी आरजीपी हांणी विरोध केल्या उपरांत मुख्यमंत्री डॉ. प्रमोद सावंत हांच्या हस्तक्षेपा उपरांत वेर्णेंच्या इंडोको रिमेडीज फार्मा कंपनीन नोकर भरती करपा खातीर भुयसरांत आयोजीत केल्ल्यो मुलाखती रद्द केल्यो. इंडोको फार्मा कंपनीन वेर्णाच्या प्रकल्पा खातीर क्वालिटी अॅश्यूरन्स, क्वालिटी कंट्रोल, मायक्रोबायलॉजी आनी प्रोडक्शन हांचे खातीर ही पदां जाहीर केल्लीं.
गोवा फॉरवर्डाचे अध्यक्ष आनी आमदार विजय सरदेसाय हांणी आतां सोशल मिडियाचेर एक जायरात घालून गोंयची फार्मा कंपनी इनक्युब इथिकल ही पुण्यांत मुलाखती घेता आनी गोंयच्या तरणाट्यांक नोकऱ्यां पसून पयस दवरता अशें स्पश्ट केलां.
इंडोको रिमेडीज उपरांत गोंयांतल्या आनीक एका इनक्युब रेमेडीज कंपनीन गोंयांतल्या प्रकल्पां खातीर पुण्यांत मॅन्युफॅक्चरिंग व प्रोडक्शन पदां खातीर भरती जायरात प्रसिध्द केल्या. गोंयांत वावुरपी कंपन्यो गोंयच्या तरणाट्यांक नोकऱ्यो दिनात. ह्या प्रकारांचेर आळाबंदा हाडपा खातीर योग्य धोरणाची गरज आसा अशें सरदेसाय हांणी सांगलें.
थळाव्या गोंयकारांक नोकऱ्यांनी आरक्षण मेळोवपाची येवजण बेगोबेग चालीक लावपाची गरज आसा. तेन्नाच गोंयकार तरणाट्यांक नोकऱ्यो उपलब्ध जातल्यो अशें सरदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
