भांगरभूंय | प्रतिनिधी
मडगांव, प्रतिनिधी ः गोंयांतल्यान रेल्वेंतल्यान सोरो व्हरपी कर्नाटकांतल्या एका दुबाविताक कोंकण रेल्वे पुलिसांनी अटक केल्या. ताचे कडल्यान 33 हजारांचो 98 लिटर सोऱ्याचो सांठो जप्त केला. कोंकण रेल्वे पुलिसांनी मंगळारा रातीं ही कारवाय केली.
कोंकण रेल्वे पुलीस सदचे भशेन मडगांव रेल्वे स्टेशनाचेर गस्त घालताले. तेन्ना सव्या क्रमांकाच्या प्लॅटफॉर्माचेर एका मनशाच्यो हालचालींचेर तांका दुबाव आयलो. तेन्ना गस्त घालपी पुलिसांनी त्या मनशाक कोंकण रेल्वे पुलीस स्टेशनांत हाडून ताच्या सामानाची तपासणी केली. तेन्ना ताच्या पोतयेंत सोऱ्याच्यो बाटल्यो सांपडल्यो. दुबावित कर्नाटकांतलो रावपी आसून रेल्वेंतल्यान बेकायदेशीर रितीन सोऱ्याची तस्करी करता अशें कळ्ळें. उपरांत ताका अटक केली. ताचे कडल्यान 98 लिटर सोरो जप्त केला. ताचें मोल 33 हजार 132 रुपया इतलें आसा. ह्या प्रकरणाची फुडली चवकशी कोंकण रेल्वे पुलीस निरिक्षक सुनील गुडलर हांच्या मार्गदर्शना खाला सुरु आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
