भांगरभूंय | प्रतिनिधी
7 लाख 98 हजार जप्त, कर्नाटक वेंचणूक आयोग पंगडाची कारवाय
पणजी, बातमीदार ः गोंयातल्यान कर्नाटकांत पयश्यांची बंडलां घेवन वतना कर्नाटक वेंचणूक आयोगाच्या पंगडान कणकुंबी चेक पोस्टाचेर एका दुबाविताक आडायलो. तपासणी केले उपरांत ताचे कडेन 7 लाख 98 हजार मेळ्ळे. ताचे कडेन कसलेच वैध कागदपत्र नाशिल्लें. देखून लोकसभेचे वेंचणुकेचे आदर्श आचारसंहितेचें उल्लंघन केल्ल्यान सगली रोख रक्कम जप्त केल्या.
बेळगांव जिल्ह्यांतल्या गांधीनगर ओनी, वन्नूर हांगाच्या संजय बसवराज रेड्डी नांवाचो हो दुबावीत आयज सकाळीं 8.30 वरांचेर गोंयांतल्यान चोर्ला घांट मार्गान बेळगांव वतालो. काणकुंबी अबकारी खात्याच्या चेक पोस्टाचेर पावले उपरांत ताच्या हालचालींचेर दुबाव आयलो. ते खातीर खानापुरा तालुक्याच्या वेंचणूक पंगडान ताची तपासणी केली. तेन्ना ताचे कडेन 7 लाख 98 हजार रुपया रोख मेळ्ळे. हे पयशे खंयच्यान हाडले? हाची चवकशी करतना ताणें कसलेच वैध कागदपत्र दिवंक नात. ही रक्कम गोंयांतल्या एका कामाचें बिल आसा अशें सांगलें. पूण ताचे कडेन हे विशीं अधिकृत कागदपत्रां नाशिल्लीं. देखून पंगडान ती रक्कम जप्त केली. हाचो पंचनामो पंगडाचे अधिकारी मलगौडा पाटील हांणी केला आनी अहवाल जिल्होधिकाऱ्यांक सादर केला.
पयशे घेवन भोंवप्यां खातीर आचारसंहिता
देशभरांत लोकसभा वेंचणुकेची आचारसंहिता 16 मार्चा सावन लागू जाल्या. देखून वेंचणुकेच्या काळांत कागदपत्रां नासतना 50 हजारां परस चड रोख रक्कम घेवन भोंवपी कोण मेळ्ळ्यार ती रक्कम बेगोबेग जप्त करपाचो आदेश वेंचणूक आयोगान अधिकाऱ्यांक दिला. ताचे परस चड रक्कम आसल्यार अधिकृत कागदपत्रां दाखोवप सक्तीचें केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.