भांगरभूंय | प्रतिनिधी
पणजी, बातमीदार ः म्हापशें अर्बन बँकेचे अध्यक्ष आसतना अॅड. रमाकांत खलप हांणी बँकेची सामकी वाट लायली. लोकांक चुकीचें पद्दतीन रीण दिलां हें आपूण सिद्द करतलों अशें सांगून वीज मंत्री सुदीन ढवळीकार हांणी आयतारा खलपांचेर खर टिका केली. काँग्रेसीचे तिनूय आमदार लोकसभा वेंचणुके उपरांत पक्ष सोडटले. गोंयांतले काँग्रेसीची ही निमणी लोकसभा वेंचणूक थारतली, असोय दावो तांणी केला.
पणजेच्या पक्ष कार्यालयांत जाल्ले पत्रकार परिशदेंत ते उलयताले. हे खेपे लोकसभेचे वेंचणुकेंत आशिल्ल्या उत्तर गोंयच्या काँग्रेसीचो उमेदवार रमाकांत खलपाक मगो पक्षान पयलेच खेपे खासदार केलो. ते उपरांत ते केंद्रांत मंत्रीय जाले. पूण, काँग्रेस पक्षांत येतकच ते मगो पक्षाक साप्प विसरले. सामान्य लोकांक म्हत्वाची आशिल्ल्या म्हापशें अर्बन बँकेचे अध्यक्ष आसतना तांणी बँकेची सामकी वाट लायली. देखूनच बँक कोसळ्ळी. तांणी लोकांक चुकीचें पद्दतीन रीण दिलें, हें आमी पुराव्यान सिद्ध करूंक शकतात अशें मंत्री ढवळीकार हांणी सांगलें.
सध्या काँग्रेस मडकय मतदारसंघांतल्यान पुरायपणान भायर आसा. लोकसभा वेंचणुके उपरांत काँग्रेसीचे तिनूय आमदार काँग्रेसींतल्यान भायर सरून हेर पक्षांत येतले. देखून गोंयांतल्यान काँग्रेस पुरायपणान ना जातली. ही गोंयांतले काँग्रेसीची निमाणी लोकसभा वेंचणूक आसतली असो दावो तांणी केला.
मजगतीं, लोकसभा वेंचणुकेंत मगो पक्षान एनडीए आघाडीक तेंको दिला. देखून भाजपाचे दोनूय उमेदवार जिखपा खातीर पक्ष पुराय वावुरतलो. राज्यांतल्या चोवीस मतदारसंघांत मगोची दरेकी सुमार तीन हजार मतां आसात. भाजपाच्या उमेदवारांक हीं चडान चड मतां मेळोवन दिवपाचो आमी यत्न करतले. दरेका मतदारसंघांत उण्यांत उण्यो चार भौशीक बसका जातल्यो अशेंय मंत्री ढवळीकार हांणी स्पश्ट केलें.
बाबू नानोस्कार परतून मगो पक्षांत
एका वेळचे दाबोळेंतले मगोचे सक्रीय फुडारी आशिल्ले पूण निमाणे विधानसभा वेंचणुके वेळार पक्ष सोडिल्ले बाबू नानोस्कार हांणी आयतारा परतून मागो पक्षांत प्रवेश केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
