भांगरभूंय | प्रतिनिधी
गिरीश चोडणकारः भाजपान एसटी, ओबीसींक त्रास दिल्ल्याचो दावो
भांगरभूंय । प्रतिनिधी
मडगांवः गोंयांतल्या भोवजन समाजाची मतां भाजपाक जाय आसतात, पूण ह्याच भाजप सरकारा कडल्यान भोवजन समाजाक लक्ष्य करून तांचें फुडारपण सोंपोवपाचो यत्न जाता. सरकाराचें दरेक पावल हें भोवजन समाजाच्या विरोधांतलें आसा. सरकारा विशीं भोवजन समाजांत नाराजी आसा, अशें मत काँग्रेस फुडारी गिरीश चोडणकार हांणी उक्तायलें. गोंयांतले सध्याचे परिस्थिती विशीं प्रसार माध्यमां कडेन चोडणकार उलयताले. गोंय सरकारा कडल्यान भोवजन समाजाक त्रास दिवपाचे यत्न चलिल्ल्याचें दिसता. हें सरकार भोवजन समाजाच्या विरोधांतलें आशिल्ल्याचें फाटल्या कांय म्हयन्यांनी घडिल्ल्या घडणुका वयल्यान दिसता. गोंयांत भाजप सरकाराचें दरेक पावल हें भोवजन समाजाच्या विरोधांतलें आसा. गोंयांतल्या एसटी समाज भावांक सरकारा वतीन त्रास दिला. ओबीसी समाजाक आनी एसटी समाजाक लक्ष्य केला. ह्या समाजांचें फुडारपण सोंपयलां. समाजाक कसो त्रास दिवपाक मेळटलो, ते नदरेन सरकाराचे यत्न चल्ल्यात. पूण वेंचणुको आयले उपरांत एसटी समाजाची, ओबीसी समाजाची मतां तांकां जाय आसतात. भोवजन समाजाचें फुडारपण सोंपोवपाचो यत्न भाजपांतल्या एका गटां कडल्यान चल्ल्यात. ताका लागून भोवजन समाजांत भाजप सरकारा विशीं नाराजी आशिल्ल्याचें दिसता, अशें चोडणकार हांणी सांगलें.
आपले प्रतिमेक खत लावपाचे भाजपाचे यत्नः चोडणकार
कोणाक व्हिडीयो काडपाक लावन, सोशल मिडियाचो वापर करून, टिका करून दक्षीण गोंयांतल्यान लोकसभेची तिकेट आपल्याक मेळची न्हय हे खातीर भाजपा वतीन आपले प्रतिमेक खत लावपाचें यत्न फाटल्या कांय म्हयन्यांच्यान चल्ल्यात. भाजपा वतीन इतले यत्न करून लेगीत गोंयांतल्या सुसंस्कृत लोकांचो आपले वयलो मोग मातूय उणो जावंक ना, हें पळोवन बरें दिसलें. आपले प्रतिमेक खत लावपाचे भाजपाचे यत्न येसस्वी जावंक नात आनी लोकूय तांचे भकीक पडनात. लोकांच्या ह्याच मोगाच्या आदारार हे खेपे दक्षीण गोंयची लोकसभा वेंचणूक जातली, अशें गिरीश चोडणकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
