गोंयांतली कायदो – सुवेवस्था काबार

भांगरभूंय | प्रतिनिधी

काँग्रेस : राज्यपालाक हस्तक्षेप करपाची मागणी

भांगरभूंय । प्रतिनिधी

पणजी : फाटले कांय दिसांनी जाल्ल्या खुनांच्या घडणुकांक लागून गोंयांत कायदो आनी सुवेवस्था सामकीच कोसळ्ळ्या. देखून गोंयकार तशेंच पर्यटकांचे सुरक्षेचो प्रस्न उप्रासला. राज्यपाल अधिकाराचो वापर करून हे विशीं हस्तक्षेप करपाची मागणी करपी निवेदन काँग्रेसीच्या शिश्टमंडळान राज्यपालांक सादर केलें.

काँग्रेसीचे गोंय प्रभारी माणिकराव ठाकरे, प्रदेशाध्यक्ष गिरीश चोडणकार, विरोधी पक्ष फुडारी युरी आलेमांव, कार्यकारी अध्यक्ष कार्लुस फेरेरा आनी हेर फुडार्‍यांच्या शिश्टमंडळान लोकभवनांत वचून राज्यपालांची भेट घेवन तांकां निवेदन भेटयलें.

गोंयांत कायदो आनी सुवेवस्था काबार जाल्या. हाका सरकार आनी गृह खातें जापासलदार आसा, असो आरोप ठाकरे हांणी केलो.

हेर राज्यांचे तुळेंत सगल्यांत चड गुन्यांव गोंयांत घडल्यात आनी उणें करपा खातीर सरकाराचे वतीन कसलेच यत्न जायनात. देश तशेंच गोंयां खातीर कायदो सुवेस्था म्हणटा ती म्हत्वाची गजाल आसा. जर कायदो आनी सुवेवस्था सारकी ना हाचो अर्थ तो प्रदेश वा थंयचें सरकार सारकें चलना. गोंयकार हुस्क्यांत आसात, मात सरकाराक भ्रश्टाचारा बगर दुसरें कांयच खबर ना, अशी टिका ठाकरे हांणी केल्या.

जे भशेन खून, बलात्कार आनी चोरयो सारकिल्ल्यो वाडपी गुन्यांवकारी घडणुको दाखोवन दितात, गोंयांत कायदो आनी सुवेवस्था ना, असो आरोप युरी आलेमांव हांणी केलो.

गोंयांत फाटल्या तीन वर्सांत 127 खून जाले, 383 बलात्कार जाले आनी 2113 चोरयो जाल्यो, 350 किडनेपींग आनी 1200 मारबडय करपाच्यो घडणुको जाल्यो. गोंयांत कायदो वेवस्था राखपाक पुलीस अपेसी थारल्यात, अशें आलेमाव हांणी म्हणलें.

गोंयांत हप्ता राज आनी गुंडा राज चलोवन पुलिसांक म्हयन्यांत अमके पयशे हाडपाचें टार्गेट दितात. आमी राज्यपालांक सांगलां, तांणी कोसळिल्लो कायदो आनी सुवेवस्था विशीं बेगिनूच हस्तक्षेप करचो आनी जापसालादरकी सुनिश्‍चीत करची, अशी मागणी आलेमांव हांणी केली.

खासा करून फाटोफाट जे दोन खून जाल्यात ते पळयल्यार गोंयकारांक गोंय असुरक्षीत दिसपाक लागलां. आवय बापायक आपल्या भुरग्यांक शाळेंत धाडपाक भिरांत दिसता. लोकांक घरांतल्यान भायर सरपाक भंय दिसता आनी आतां पर्यटकांक गोंयांत येवपाक भंय दिसपाक लागतलो काय कितें असो दुबाव येता, असो हुस्को गिरीश चोडणकार हांणी उक्तायलो.

कायदो आनी सुवेस्था सेगीत कोसळत आसा. देखून राज्यपालान हस्तक्षेप करून गृह खात्याचेर नियंत्रण घेवपाची गरज आसा तशेंच मुखेल सचीव आनी डीजीपी हांकां जापसालदार धरपाची गरज आसा, अशी मागणी चोडणकार हांणी केली.