भांगरभूंय | प्रतिनिधी
कॅ. विरियातो फर्नांडीसः कुठ्ठाळी मतदारसंघांत काँग्रेसीची सभा
भांगरभूंय । प्रतिनिधी
मुरगांवः केंद्रांतलो भाजप सरकार आनी गोंयांतलो भाजप सरकार दाबोळी आंतरराष्ट्रीय विमानतळ सासणाचें बंद करपाच्या वावराक लागल्यात. गोंयांत कायदो सुवेवस्था पुराय कोसळ्ळ्या. हाका जापसालदार भाजप सरकार आसा, असो आरोप दक्षीण गोंय लोकसभा उमेदवार कॅप्टन विरियातो फर्नांडीस हांणी केलो. गोंय स्वयंपूर्ण करतलों, अशें मुख्यमंत्री डॉ. प्रमोद सावंत सांगता. पूण गोंयांतली बेरोजगारी सगळ्यांत चड आशिल्ल्याची म्हायती स्वता प्रधानमंत्री मोदी हांणी दिवन मुख्यमंत्री डॉ. सावंत हांचेर एके तरेन बडी मारल्या, अशें कॅ. विरियातो हांणी सांगलें.
दाबोळीचो सुपूत तशेंच दक्षीण गोंयचो उमेदवार कॅ. विरियातो हांची प्रचारसभा कुठ्ठाळी मतदारसंघांत जाली. ह्या वेळार ते उलयताले.
गोंयांत बेरोजगारी गतीन वाडटा. हाका पुराय जापसालदार राज्य भाजप सरकारचो मुख्यमंत्री आनी ताचे मंत्री, आमदार आसात. मुरगांव म्हालाचे पालकमंत्री एके सभेंत सांगतात, येता ते लोकसभा वेंचणुकेंत आपली दोट्टी हार जातली. प्रत्यक्षांत मुरगांव म्हालांत काँग्रेस पक्षाक भोवमत मेळटलें. तशेंच दाबोळी मतदारसंघांत सुनामी येवन थळाव्या मंत्र्याक राजिनामो दिवचो पडटलो. दाबोळी विमानतळाचेर भांगराची तस्करी करप्याक दाबळीचे लोक लोकसभा वेंचणुकेंत धडो शिकयतले, अशें कॅ. विरियातो हांणी सांगलें.
काँग्रेस प्रदेशाध्यक्ष अमीत पाटकार हांणी सांगलें, दक्षीण गोंय हो काँग्रेसीचो बालेकिल्लो. ह्या मतदारसंघांत भाजपाच्या उमेदवाराक हात खावची पडटली, हें निश्चीत आसा. देशा वांगडा गोंयांत लेगीत म्हारगायेचेर नियंत्रण दवरपाक म्हारगाये विशीं कांयच खबर नाशिल्ल्यान, तांकां हेर मंत्री आनी आमदारा कडल्यान शिकवण घेवची पडटा, अशें पाटकार हांणी सांगलें.
विरोधी पक्ष फुडारी युरी आलेमांव हांणी टिका करतना म्हणलें, देश व्हड अर्थीक संकश्टांतल्यान वता. तरी लेगीत प्रधानमंत्री विदेशी भोंवड्यो आनी प्रचार सभांनी व्यस्त आसा. गोंय भाजप सरकार शिक्षीत तरणाट्यांक रोजगार मेळोवन दिवपाक फाटीं पडलां.
कुठ्ठाळीचे काँग्रेस पुडारी ओलेसियो सिमॉयश हांणी सांगलें, थळाव्या आमदारान भाजपाचो नाद सोडून गोंयच्या भल्या खातीर काँग्रेस पक्षाक तेंको दिवचो.
ह्या वेळार आमदार व्हेन्झी व्हिएगश, आमदार एल्टन डिकॉस्टा, आदली मंत्री एलिना साल्ढाणा, आदली नगराध्यक्ष तारा केरकार, बिना नायक आनी हेरांचीं उलोवपां जालीं. ह्या वेळार माचयेर गोंय काँग्रेस हेर मागास वर्गीय अध्यक्ष नितीन चोपडेंकार, गोंय काँग्रेस अल्पसंख्यांक अध्यक्ष नियाजी शेख आनी हेर काँग्रेस फुडारी हाजीर आशिल्ले. कुठ्ठाळी काँग्रेस गट अध्यक्ष पिटर डिसोझा हांणी सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
