भांगरभूंय | प्रतिनिधी
भांगरभूंय । खेळां मेज
पणजीः गोंय पिकलबॉल असोसिएशन (जीपीए) अखील भारतीय पिकलबॉल असोसिएशना कडेन (एआयपीए) संलग्न जालां. गोंयांतल्या पिकलबॉल मळार क्रांती घडोवन हाडपा खातीर असोसिएशनान म्हत्वाकांक्षी येवजण जाहीर केल्या.
अध्यक्ष मनोज पाटील, सचीव पराग चौहाण आनी भांडारी प्रवीण शेणॉय हांच्या मार्गदर्शना खाला वांगड्यांच्या समर्पीत पंगडा सयत जीपीए गोंयांत पिकबॉलाक चालना दिवपा खातीर तशेंच विकसीत करपा खातीर बांदिल्लें आसा आनी एक पिकलबॉल समुदाय तयार करप आनी गोंयांक खेळाचें राष्ट्रीय आनी आंतरराष्ट्रीय केंद्र म्हणून स्थापन करप हे तांचे लक्ष्य आसा.
जीपीएन स्थापने सावन फकत एका म्हयन्या भितर चार कार्यावळीचें येसस्वी आयोजन केलें. 19 तें 21 मे मजगतीं फातोड्डे- मडगांव हाका गोय खेळां प्राधिकरणाच्या पालवान आयोजीत तिसरी पिकलबॉल राष्ट्रीय मानांकन सर्त हे खासा आकर्शण आशिल्लें. हे सर्तींत भारतांतल्या अव्वल खेळगड्यांनी सर्त करून आनी आपापसांतली इश्टागतीची भावना वाडीक लायली.
जीपीएन खेळ आनी युवा वेव्हार खात्याच्या पालवान शारीरिक शिक्षण शिक्षकां खातीर दोन कार्यशाळा लेगीत घेतल्यो. बॅडमिंटन, टॅनीस आनी टेबल टॅनीस हाच्या सयत पिकलबॉल सगल्या पिरायेच्या आनी कुशळताय पांवड्यार लोकां खातीर एक खोशयेचो आनी प्रवेश घेवपा सारको अणभव दिता. गोंय पिकलबॉल असोसिएशनान राज्यभर ह्या खेळाची आनीक उदरगत करपाचेर लक्ष्य केंद्रीत केलां. वेगवेगळी नखेत्री हॉटेलां आनी शिक्षणीक संस्था मदी पिकलबॉलाची वळख करून दिवप आनी गोंयांतल्या तालुक्यांनी व्हो खेळ व्हरप ही ताचे नदरेन म्हत्वाची गजाल आसा. गोंयांत राष्ट्रीय आनी आंतरराष्ट्रीय चॅम्पियनशीप सर्ती आयोजीत करपाची तांची मोख आसा.
राष्ट्रीय सर्तींत रुप्या पदक जिखपी आदलो राज्य टेबल टॅनीस चॅम्पियन नोएल नोरोन्हा हाणे खेळांतलो सादेपण आनी सगळ्यांक आसपावून घेवपाची तोखणाय केली. पिकलबॉल वेगवेगळ्या रॅकेट खेळांतल्या घटटांक एकठांय हाडटा आनी तो एक आकर्शण आनी सगळ्यांक आसपावून घेवपी खेळ थारता अशें ताणे सांगलें.
———————————–
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
