भांगरभूंय | प्रतिनिधी
पणजीः राष्ट्रीय कुटूंब भलायकी सर्वेक्षण (एनएफएचएस) अहवाला प्रमाण गोंयांतल्यो बायलो इंटरनॅट वापरपाचे नदरेन देशांत सगल्यांत फुडें आसात. राज्यांतल्या १५ ते ४९ पिरायेच्या वट्ट ९४ टक्के बायलांनी केन्ना ना केन्ना इंटरनेट वापरिल्ल्याची नोंद केल्या. ही टक्केवारी राष्ट्रीय सरासरी ६४.३ टक्क्यां परस चड आसा.
अहवाला प्रमाण, फाटल्या दोन वर्सांनी गोंयांत बायलांच्या इंटरनेट वापरांत २०.३ टक्क्यांची वाड जाल्या. विशेश म्हळ्यार, राज्यांत बायलांचो इंटरनेट वापर दादल्यांचे तुळेंत ३.१ टक्क्यांनी अदीक आशिल्ल्याचेंय स्पश्ट जालां. दादल्यां मदीं हें प्रमाण ९०.९ टक्के इतलें नोंद जालां.
गांवगिर्या वाठारांत ९२.४ टक्के बायलांनी इंटरनेट वापरिल्ल्यान शार वाठारांत हें प्रमाण ९५.२ टक्के इतलें आसा. दादल्यांचे बाबतींत गांवगिर्या वाठारांत ९६ टक्के आनी शारी वाठारांत ८७.४ टक्के इंटरनेट वापर नोंद केला.
हेर राज्यां कडेन तुळा
देशांत सिक्कीम (९०.३ टक्के), केरळ (८७.३ टक्के) आनी मिझोरम (८२.५ टक्के) हींय राज्यां बायलांच्या इंटरनेट वापरांत मुखार आसात. जाल्यार त्रिपुरा (४८.८ टक्के), ओडिशा (५१ टक्के), कर्नाटक (५७.९ टक्के) आनी पश्चीम बंगाल (५९ टक्के) ह्या राज्यांनी हें प्रमाण तुळे प्रमाण उणें आसा.
सर्वेक्षणांत बायलां सबलीकरणा कडेन संबंदीत पांच मुखेल निकशांचो अभ्यास केला. तातूंत गोंयच्यो बायलो राष्ट्रीय सरासरी परस मुखार आशिल्ल्याचें दिसून आयलां.
राज्यांत कुटुंबांतले निर्णय प्रक्रियेंत बायलांचो आसपाव ९२.५ टक्के इतलो आसा. हातूंत घरगुती खरेदी, भलायके संबंदी निर्णय आनी सोयर्यांक मेळपाचे निर्णय हांचो आसपाव आसा. हे विशीं राष्ट्रीय सरासरी ८९ टक्के आसा.
गोंयच्या ९१.१ टक्के बायलां कडेन स्वताचें बँक खातें आशिल्ल्याचें अहवालांत नमूद केलां. हें प्रमाण अर्थीक स्वावलंबनाचे नदरेन सकारात्मक मानतात.
हो अहवाल गोंयच्या बायलांचें वाडपी डिजिटल सक्षमीकरण, तंत्रज्ञानाचो व्यापक वापर आनी समाजीक-अर्थीक निर्णय प्रक्रियेंत वाडपी आसपाव स्पश्टपणान दाखयता.
स्वताचो मोबायल आशिल्ल्याचें प्रमाण ८९ टक्के
अहवाला प्रमाण, गोंयच्या ८९.९ टक्के बायलां कडेन स्वताचे मोबायल आसात आनी तांचो वापर तीं स्वता खातीरूच करतात. हाची राष्ट्रीय सरासरी ६३.६ टक्के आसा. राज्यांतल्या शारी भागांतलीं ९२ टक्के जाल्यार गांवगिर्या भागांतल्या ८७.१ टक्के बायलां कडेन स्वताचे मोबायल आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
