भांगरभूंय | प्रतिनिधी
पणजी: राज्यांतल्या पात्र 6,228 शेतकारांच्या बँक खात्यांत प्रधानमंत्री किसान सन्मान निधीचो 17 वो हप्तो जमा केलो. प्रधानमंत्री नरेंद्र मोदी हांणी वाराणसी हांगा जाल्ले कार्यावळींत देशभरांतल्या शेतकारांक निधी वितरीत केलो.
देशभरांतल्या शेतकारांक अर्थीक मजत म्हूण केंद्र सरकारान 2014 वर्सा प्रधानंत्री किसान सन्मान निधी येवजण सुरू केली. येवजणे खाला पात्र शेतकारांक दरेक वर्सा तीन टप्प्यांत दरेकी दोन हजार रुपया अशें मेळून स हजार रुपया दितात.
फाटल्या वर्सा खात्यान आयकर भरपी तशेंच जमनी नांवार नाशिल्ल्या राज्यांतल्या 3,700 शेतकारांक किसान सन्मान निधी येवजणेंतल्यान वगळिल्ले. तशेंच तांणी घेतिल्ली रक्कम सरकाराक परत करपाची नोटीस शेतकी खात्यान जारी केल्ली. हाचे वेल्यान अपात्र थारिल्ल्या शेतकारां मदीं खवदळ पडिल्लो.
खंयचेच परिस्थितींत आपणाक मेळिल्ली रक्कम सरकाराक परतून करचे नात असो पवित्रो घेवन मुख्यमंत्री डॉ. प्रमोद सावंत हांकां हातूंत लक्ष घालपाची मागणी केल्ली. उपरांत शेतकारांच्या मागणेची दखल घेवन मुख्यमंत्री डॉ. प्रमोद सावंत हांणी ह्या शेतकारांक मेळिल्ली 4.94 कोटींची रक्कम राज्य सरकारा वतीन केंद्राक दिवपाचो निर्णय घेतिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
