भांगरभूंय | प्रतिनिधी
पणजी, प्रतिनिधी : गोंयच्या हिता खातीरूच कोमुनिदाद कायद्यांत बदल केल्यात. ते प्रमाण ज्या कारणा खातीर जमीन दिल्या तिचो त्याच कारणा खातीर वापर करपाक मेळटलो. आमदार कार्लुस फेरेरा हांणी हाचेर केल्ली टिका ही फकत राजकी हेतून केल्या अशें मत भाजप म्हणयारे यतिश नायक हांणी उक्तायलें.
बिरेस्तारा पणजे जाल्ले पत्रकार परिशदेंत ते उलयताले. ह्या वेळार ग्लेन टिकलो आनी गिरिराज पै वेर्णेंकारूय हजर आशिल्ले.
नेमांत बदल केल्ल्यान कोमुनिदादाक कसलोच धक्को बसचो ना. भुंयखंडाचो गैरवापर जावचो न्हय म्हणूनय ही दुरुस्ती उपेगाची थारतली. हे दुरुस्तीक लागून गोंयकारांचो फुडार बरो जातलो. तशेंच जमनींचो अयोग्य तरेन वापर जावचो ना. कोमुनिदादची भूंयखंड दिवपाची प्रक्रिया आदले वरींच आसतली. कोडा प्रमाण पात्र आशिल्ल्यांकूच भूखंड दितले.
हातूंत विरोध करपा सारकें कांयच ना, तरी आमदार कार्लुस फेरेरा आनी कांय जाण विरोध करतात. खरें म्हळ्यार गोंयकारांच्या हिता खातीर केल्ल्या कायद्यांक वा तांतल्या दुरुस्तीक विरोधकां सयत सगळ्यांचें फाटबळ आसपाक जाय. फाटली विधानसभा अधिवेशनांत मंजूर जाल्ले भाडेकरू पडताळणी कायदोय राज्याच्या सुरक्षे खातीर गरजेचो आसा. हातूंत भाडेकरूंची म्हायती एकठांय करतात. सरकाराचो हो निर्णयूय बरो आशिल्ल्याचें नायक हांणी सांगलें.
ग्लेन टिकलो हांणी सांगलें, कांय वर्सां आदीं हळदोणें मतदासंघांत एका कोमुनिदाद जमनींत एक व्हडा प्रकल्प येवपाचो आशिल्लो. हे खातीर नगर नियोजन खात्यान सगळे परवाने दिल्ले. मात थळाव्यांचो विरोध आशिल्ल्यान आमी तेन्नाचे मंत्री बाबू कवळेंकार हांकां मेळून प्रकल्प रद्द करपाची मागणी केल्ली. गांवकारांचें म्हणणें आयकून सरकारान हो प्रकल्प रद्द केल्लो. सध्याचे आमदार कार्लुस फेरेरा हांणी मात ह्या प्रकल्पाक फाटबळ दिल्लें. ताका लागून तांकां आतां कायदो दुरुस्तीचेर टिका करपाचो मात्तूय अधिकार ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
