भांगरभूंय | प्रतिनिधी
पणजी : इंडियन मेडिकल असोसिएशनाचे फोंड्यां काल जाल्ले एके कार्यावळींत गोंयच्या ७ दोतोरांनी ‘लिव्हिंग विल’चेर सय केली. डॉ. संदेश चोडणकार, डॉ. दत्ताराम देसाय, डॉ. संतोष उसगांवकार, डॉ. शेखर साळकार, डॉ. मेधा साळकार, डॉ. पौर्णिमा उसगांवकार, डॉ. कल्पना चोडणकार हांणी ‘लिविंग विल’ जाहीर केली.
कर्करोग, स्मृतिभ्रंश वा खर काळजाचें दुयेंस अश्या दुयेंसां मदीं दुयेंती निमाण्या टप्प्यांत आसल्यार तांचेर उपचार करपूय कठीण जाता. तांचेर कसलेच उपचार जायनात आनी तांचें जगपूय कठीण जाता. निमाण्या टप्प्यांत ते निर्णय घेवपाकूय सक्षम नासतात. हातूंत जर तांचे फाटल्यान निर्णय घेवपी कोणूच नासल्यार, त्या दुयेंतीचो व्हेंटिलेटर काडपाचो, तांचेर उपचार करप बंद करचे काय? हे निर्णय घेवप दोतोरांकूय कठीण वतात.
अशे स्थितींत दोतोरांक निर्णय घेवपाची मुभा कायदेशीर कागदपत्रां वरवीं संबंदीत व्यक्तीन पयलींच दिल्यार दोतोरांक बरें पडटलें. हाची अंमलबजावणी करपाचो निर्देश सर्वोच्च न्यायालयान दिल्लो. ते प्रमाण कोणाकूच ‘लिव्हिंग विल’ पत्राचेर सय करून दवरपाक शकता. हाची अंमलबजावणी करपी गोंय हें देशांतलें पयलें राज्य थारलां.
फाटल्या ३१ मेक मुंबय उच्च न्यायालयाचे न्यायाधीश महेश सोनक हांणी सगळ्यांत पयलीं ‘लिव्हिंग विल’चेर सय केली आनी ते ‘लिव्हिंग विल’करपी गोंयचे पयले नागरीक थारिल्ले. सर्वोच्च न्यायालयान जारी केल्ल्या मानकां प्रमाण वैजकी निर्देशांची अंमलबजावणी करपी गोंय हें देशांतले पयलेंच राज्य थारलां, अशें न्या. सोनक हांणी सांगिल्लें.
हे कार्यावळी मजगतीं हे विशींच्या ‘प्रगत वैद्यकीय निर्देश’ पुस्तिकेचेंय प्रकाशन जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
