भांगरभूंय | प्रतिनिधी
पणजी : गोंयच्या सर्गेस्त स्वातंत्र्यसैनिकांच्या नांवाचो वापर करून ऑनलायन फटवणूक केल्ल्याचो धक्को दिवपी प्रकार मुखार आयला. सोशल मिडिया सयत विवीध डिजिटल प्लॅटफॉर्मा वरवीं सुटके झुजार्यांचीं नांवां आनी वळख वापरून नागरिकांची दिशाभूल केल्ल्याची म्हायती मेळ्ळ्या.
ज्येश्ठ सुटकेझुजारी स. पुरुषोत्तम काकोडकार हांच्या नांवान इन्स्टाग्रामाचेर प्रोफायल केला. ताचे खाला स. मोहन रानडे, डॉ. ज्युलीयांव मिनेझिस, विश्वनाथ लवंदे तशेंच हेर स्वातंत्र्य सैनिकांचीं नांवां आसात. ‘नोंदणीकृत सुटकेझुजारी’, ‘आजून अंगोलात’, ‘वकिलांची गरज आसा’, इंग्लीश भाशेंतल्यान अशीं कांय वाक्यां हे प्रोफायलींत आसात.
गोंय मुक्ती लढ्यांत योगदान दिल्ल्या ज्येश्ठ सुटके झुजार्यांच्या नांवान सोशल मिडियाचेर बनावट खातीं पळोवन सध्या लोकांनी तिडक उक्तायल्या. संबंदीतांचेर खर कारवाय करपाची मागणी जाता. देशाच्या स्वातंत्र्या खातीर योगदान दिल्ल्या मनशांच्या नांवाचो असल्या गैरप्रकारां खातीर वापर जावप सामकें दुर्दैवी आशिल्ल्याची प्रतिक्रिया विवीध मळावेल्यान आयकूंक येता.
लिंकाचेर विस्वास दवरचो न्हय
मजगतीं, नागरिकांनी अशे तरेच्या संदेशांचेर वा ऑनलायन लिंकाचेर विस्वास दवरचो न्हय, खंयचीय वयक्तीक म्हायती वा अर्थीक वेव्हार करचे पयलीं खात्री करून घेवची, असो उलो सायबर तज्ञांनी मारला. सायबर गुन्यांव शाखे कडल्यान ह्या प्रकरणाची चवकशी सुरू आशिल्ल्याची म्हायती आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
