भांगरभूंय | प्रतिनिधी
पणजी, प्रतिनिधी : नायजेरियन ड्रग्ज तस्कर स्टॅन्लीची बायल सिमरन उर्फ उषा चंदेल हिचो जामीन भायर मारला. गोंयच्या मुंबय उच्च न्यायालयान, ड्रग्ज तस्करीच्या अर्थीक वेव्हारांत वांटो आशिल्ल्याचें स्पश्ट जालां, अशें निरीक्षणांत नोंद जालां अशें म्हणलां. हे विशींचो आदेश न्या. भारत देशपांडे हांणी जारी केला.
मुड्डोवाडो- साळगांवच्या राजू साळगांवकार ह्या ‘रेन्ट ए बायक’ ऑपरेटराच्या घराचेर केंद्रीय नार्कोटिक कंट्रोल ब्युरोन (एनसीबी) गुप्तचरांचे म्हायती वयल्यान छापो मारिल्लो. तेन्ना एनसीबीन ताचे कडल्यान ७.३५ ग्रॅम कोकेनची ९ पाकिटां जप्त केल्लीं आनी ताका अटक केल्ली. ताची चवकशी केली तेन्ना, तांणी इवुआला उडोका स्टॅन्ली ह्या नायजेरियन नागरिका कडल्यान कोकेन घेतिल्ल्याची म्हायती दिली. तशेंच स्टॅन्ली टॅक्सी ड्रायव्हर्स, ऑपरेटरांचें गोंयांत ड्रग्सांचें एक व्हडलें नेटवर्क चलयता अशी गुपीत म्हायती दिली. तशेंच स्टॅन्ली खातीर हेर टॅक्सी चालक तशेंच रेन्ट ए बायक आनी कॅब ऑपरेटर ड्रग्साची पुरवण करपा खातीर सेवा दितात अशी म्हायती तांणी दिली.
राजू साळगांवकार हांणी दिल्ले म्हायतीची दखल घेवन एनसीबीन कांदोळी हांगच्या मायकल आनी झेवियर फर्नांडीस ह्या दोगा भावांची चवकशी केली.उपरांत एनसीबीन मायकल फर्नांडिसाक अटक केली. ताची चवकशी केली तेन्ना, स्टॅन्ली आनी ताची बायल उषा चंदेलचो कोकेन ड्रग्ज वेव्हारांत आसपाव आशिल्ल्याची म्हायती दिली. मजगतीं, स्टॅन्लीक तेलंगणा पुलिसांनी अटक केल्ल्याची म्हायती मेळ्ळी. उपरांत एनसीबीन उषा चंदेलची चवकशी केली तेन्ना, तिच्या बँक खात्यांतल्यान ड्रग्ज तस्करी खातीर अर्थीक वेव्हार जाता हें दिसून आयलें. ते प्रमाण, एनसीबीन तिका अटक केली. न्यायालयान तिका बंदखण फर्मायली.
मजगतीं, तिणें उत्तर गोंय जिल्हो आनी सत्र न्यायालयांत दाखल केल्ले जामीन अर्ज भायर मारले. उपरांत उषा चंदेल हिणें गोंयच्या मुंबय उच्च न्यायालयांत वयल्या आदेशाक आव्हान देवन जामीन दिवपाची मागणी केली.
हे विशीं उच्च न्यायालयांत सुनावणी जाली तेन्ना, भारताचे डेप्युटी सॉलिसिटर जनरल प्रवीण फळदेसाय हांणी एनसीबी वतीन बाजू मांडली. तातूंत तांणी उषा चंदेल हाच्या एकाच बँक खात्याची चवकशी केली तेन्ना तातूंत व्हडा प्रमाणांत अर्थीक वेव्हाराचे पुरावे सांपडले. तशेंच तिणें आपल्या आनी भावाच्या नांवार मालमत्ता घेवपाचें मुखार आयलें. तशेंच तिचो नायजेरियन घोव स्टॅन्ली हाका तेलंगणा पुलिसांच्या पंजागुट्टा पुलिसांनी ड्रग्ज तस्करी प्रकरणांत अटक केली.
ताचे कडल्यान ८ कोटी रुपयांचें ५५७ ग्रॅम कोकेन, ३९० ग्रॅम एक्टसी टेब्लेट्स, २१ ग्रॅम हेरॉइन, ४५ ग्रॅम गांजो, ३ ग्रॅम एलएसडी ब्लॉट्स, २१५ ग्रॅम चरस, ७ ग्रॅम ऍम्फेटामाइन आनी १९० ग्रॅम गांजा सयत ५.४० लाख रुपया जप्त केल्ल्याचो युक्तिवाद फळदेसाय हांणी मांडलो. ताका लागून दुबावीत उषा चंदेल हिचो ड्रग्ज तस्करींत आस्पाव आशिल्ल्याचें पयलींच स्पश्ट जाल्ल्यान तिचो जामन भायर मारपाची मागणी केली. ह्या प्रकरणांत न्यायालयान दोनूय पक्षांची बाजू आयकून घेतल्या उपरांत तिचो जामीन भायर मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
