भांगरभूंय | प्रतिनिधी
केंद्रीय नार्कोटिक कंट्रोल ब्युरोच्या गोंय विभागाची कारवाय
पणजी, प्रसाद शेट काणकोणकार ः गोंयच्या दर्यादेगेवेल्या वाठारांनी ड्रग्स तस्करींत ‘रेन्ट ए बायक’ आनी कॅब ऑपरेटरांचो व्हड प्रमाणांत हात आसा अशीं म्हायती मुखार आयल्या. केंद्रीय नार्कोटिक कंट्रोल ब्युरोच्या (एनसीबी) गोंय विभागान कारवाय करून ह्या प्रकरणांत दोन ‘रेन्ट ए बायक’ आनी कॅब ऑपरेटरांक अटक केल्या.
ह्या कारवायेत खांपो नायजेरियन ड्रग्स तस्कर स्टॅन्लीच्या बायलेकय अटक केल्या. हाचे भायर हैदराबाद पुलिसांनी गोंयांतल्या दोन कॅब ऑपरेटरां आड ड्रग्स तस्करींत वांटो घेतिल्ल्यान कारवाय केल्या. हे प्रकरणांत आनीक कांय जाणांचेर कारवाय जातली अशीय म्हायती मेळ्ळ्यां.
एनसीबीन मुड्डोवाडो- साळगांवांतल्या ‘रेंट अ बायक’ ऑपरेटर राजू साळगांवकार हांच्या घराचेर धाड घाली. त्या वेळार एनसीबीन ताचे कडल्यान 7.35 ग्राम कोकेनाचीं 9 पॅकेट जप्त करून ताका अटक केली. उपरांत तांची फुडली चवकशी केली तेन्ना ताणें इवुआला उडोका स्टॅन्ली ह्या नायजेरियन नागरिका कडल्यान कोकेन घेतला अशें सांगलें. तशेंच टॅक्सी ड्रायव्हर्स आनी ऑपरेटरचे गोंयांत ड्रग्साचे व्हड नेटवर्क चलता अशीं गुप्त म्हायती स्टॅनलीन दिली. हाचे भायर स्टॅनली खातीर हेर टॅक्सी ड्रायव्हर तशेंच रेंट-ए-बायक आनी कॅब ऑपरेटर पुरवण करपा खातीर सेवा दितात अशींय म्हायती तांणे दिली.
हे म्हायती उपरांत एनसीबीन कांदोळीच्या मायकल आनी झेवियर फर्नांडीस ह्या दोन भावांची चवकशी केली. उपरांत एनसीबीन मायकल फर्नांडीस हाका अटक केली. उपरांत ताची पुराय चवकशी केली तेन्ना स्टॅनलीची बायल सिमरन उर्फ उशा चंदेल हिचोय कोकेन ड्रग्स वेव्हारांत वांटो आशिल्ल्याचें कळ्ळें. रोख वेव्हार करी नासतना तिच्या बँक खात्याचो वापर ड्रग्स वेव्हारा खातीर जाता अशी म्हायती मेळ्ळी. तशेंच स्टॅनली आपल्या टॅक्सींतल्यान ड्रग्साचो वेपार करता अशेंय ताणें सांगलें. कांय दिसां आदीं स्टॅनलीन सांगिल्ल्या प्रमाण मायकलान मोरजींतल्या एकाक कोकेन ड्रग्स पुरवण केल्ल्याची म्हायती दिली.
हे म्हायती उपरांत एनसीबीन सराईत नायजेरियन ड्रग्स तस्कर इवुआला उडोका स्टॅनली हाची बायल सिमरन उर्फ उशा चंदेलाक अटक केली. तिची चवकशी करतना मायकल आनी राजून दिल्ली म्हायती खरी आसा हें स्पश्ट जाले. तशेंच तिचो घोव स्टॅनली टॅक्सी धनी आनी रेन्ट ए बयक आनी कॅब ऑपरेटरच्या आदारान जायत्या वर्सां सावन वेगवेगळ्या ड्रग्साची तस्करी करता अशी गवाय तिणें दिली. एनसीबीन तिची फुडली चवकशी केली तेन्ना स्टॅनलीक तेलंगणा पुलिसांनी अटक केल्ल्याची म्हायती मेळ्ळी.
इवुआला उडोका स्टॅन्ली टॅक्सी धनी आनी रेन्ट ए बायक आनी कॅब ऑपरेटराच्या आदारान उत्तर गोंयच्या दर्यादेगेवेल्या वाठारांनी तशेंच तेलंगण राज्यांत ड्रग्साची तस्करी करता. हे खातीर तो गोंयांक भेट दिवपी पर्यटकांक वांगड्याच्या मजतीन गोंयांत तशेंच तेलंगणाच्या वाठारांत तस्करी करता. हाचे भायर रशियन तशेंच दर्यादेगेवेल्या वाठारांतल्या तरणाट्यांचो हांतूत व्हड वांटो आसा.
तेलंगणा पुलिसांनी इवुआला उडोका स्टॅनली हाका अटक करून ताचे कडल्यान ८ कोटींचे 557 ग्राम कोकेन, 390 ग्राम एक्टसी टॅबलेट्स, 21 ग्राम हेरॉइन, 45 ग्राम गांजो, 3 ग्राम एलएसडी ब्लॉट्स, 215 ग्राम चरस, 07 ग्राम अॅम्फेटामाइन आनी 190 ग्राम गांजो जप्त केल्या.
कॅब ऑपरेटराक पुण्यांतल्यान अटक…
तेलंगणा पुलिसांनी हडफाडेच्या रेन्ट ए बायक आनी कॅब ओपरेटर हनुमंत बाबूसो दिवकार उर्फ बाबा हाका पुण्यांतल्यान अटक केल्या. ताचे आड कोकेन आनी हेर ड्रग्स तस्करी करपा संबंदी दोन वेगवेगळे गुन्यांव नोंद केल्यात. ताचे वांगडाच स्टॅनली सयत अजून सुमार 45 जाणांचेर गुन्यांव नोंद केल्यात. हातूंत गोंयांतले टॅक्सी चालक हांचे वांगडा नाईट क्लब ड्रायव्हर, रेन्ट ए बायक आनी कॅब ऑपरेटरांचो आस्पाव आसा.
तेलंगणा पुलिसांचीय कारवाय…
तेलंगणा पुलिसांनी आसागांवच्या रेंट ए बायक आनी कॅब सराईत ड्रग्ज तस्कर विशाल मांद्रेकार उर्फ पागल हाका गोंयांतल्यान ताब्यांत घेतले. उपरांत तेलंगणा पुलिसांनी थंय ताका रीतसर अटक केली.
ह्या तस्करीत गोंयांतले एडवीन, हनुमंत बाबूसो दिवकार उर्फ बाबा, प्रेमानंद उर्फ प्रेम, मॅक्स आनी आलेक्स रशियन नागरिक, दिल्लींत रावपी जॉन (नायजेरियन) आनी हेर लोकांचो आस्पाव आशिल्ल्याची म्हायती मुखार आयली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
