भांगरभूंय | प्रतिनिधी
कंपनी ८० ते १०० कर्मचार्यांक कामाक घेवपाचे तयारेंत
पणजी: २०२४ च्या अर्थीक वर्सा २४ परस चड उमेदवारांक पर्वरेची तंत्रज्ञान कंपनी आपले सयत काम करपाची संद दिता. गोंयच्या तरणाट्यांचेर लक्ष दिवन हे कंपनीन दुसरे फावट नोकर भरती मोहीम सुरु केल्या, अशी म्हायती कंपनीच्या अधिकार्यान दिली. हे कंपनीचें नांव जावन आसा ‘किलोवॉट’. ही गोंयची नामनेची तंत्रज्ञान कंपनी.
५०० परस चड कंपन्यांक सेवा दिवपी हे कंपनीन अर्थीक वर्साचे सुरवातेक सावन ३० नवे कर्मचारी नियुक्त केल्या. तशेंच वर्साचे निमाणे कडेन आनी ८० ते १०० कर्मचार्यांक कामाक घेवपाचे तयारेंत ही कंपनी आसा. किलोवॉट खातीर कर्मचारी नियुक्त करपाची प्रक्रिया रिक्रूट ही एचआर कंपनी करता.
हालींची किलोवॉटची नियुक्ती विवीध विभागांनी व्यापल्या, जातूंत आशिया, उत्तर अमेरिका आनी युरोपांतल्या कंपन्यां वांगडा काम करप्यांचे कुशळटायेचो आसपाव आसा. नियुक्त केल्ल्या ह्या प्रतिभां मदीं तांत्रीक, गैर-तांत्रीक, फ्रेशर्स आनी पीएचडी, वर्डप्रेस, नेट, रिऍक्ट आनी नोड सॉफ्टवेअर डेव्हेलोपर आसात. तशेंच कंपनींत मॅन्युअल आनी ऑटोमेशन चाचणेंत तज्ञ आशिल्लें सॉफ्टवेअर परीक्षक आनी सामग्री क्युरेशन, एससीओ, सशुल्क जाहिराती, जायरात विश्लेशण आनी सोशल मीडिया वेवस्थापनांत कुशल डिजिटल मार्केटिंग विशेशज्ञ आसात.
किलोवॉट हातूंत एचआर, फायनान्स आनी सेल्सांत वेवसायिकांची तशेंच प्रोजेक्ट मॅनेजर, डिलिव्हरी मॅनेजर आनी ऑपरेशन्स मॅनेजर अश्या वेवस्थापकीय भुमिकांची नियुक्ती केली.
आमी नवे करार केल्यात आनी आमचे वाडीचे संदी विशीं उमेदी आसा. गोंयांत आमचो कर्मचारी आंकडो वाडपा खातीर आनी थळाव्या आयटी क्षेत्राचे उदरगतींत योगदान दिवपाक थळाव्या पांवड्यार काम करपाक आमी वचनबद्ध आसात, अशें किलोवॉटचे सह-संस्थापक एरन फर्नांडीस हांणी म्हणलें. नियुक्तीच्या फुडल्या टप्प्यांत कंपनीचे गरजे प्रमाण विवीध विभागांनी आनीक कर्मचारी घेतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
