गोंयच्या चवगांक संगीत नाटक अकादमीचे पुरस्कार
भांगरभूंय | प्रतिनिधी
विनायक खेडेकार हांकां अकादमी रत्न पुरस्कार
पणजी, बातमीदार : संगीत नाटक अकादमीन २०२२ आनी २०२३ अशा दोन वर्सांच्या पुरस्कारांची घोशणा केली. हातूंत लोकवेदाचे ज्येश्ठ अभ्यासक पद्मश्री विनायक खेडेकर हांकां ‘फेलोशिप’ म्हळ्यार ‘अकादमी रत्न’ पुरस्कार जाहीर जाला. जाल्यार कांता गावडे हांकां लोकसंगीतांत २०२३ वर्सा खातीर ‘अकादमी पुरस्कार’ जाहीर जाला. २०२२ वर्साचो ‘उस्ताद बिस्मिल्ला खॉं युवा पुरस्कार’ महेश सतरकार (लोकनृत्य) आनी सिद्धी उपाध्ये (अभिनय) हांकां घोशीत केला. राष्ट्रपती द्रौपदी मुर्मू हांचे हस्तुकीं हे पुरस्कार भेटयतले.
नवी दिल्लीक २१ आनी २२ फेब्रुवारीक संगीत नाटक अकादमीच्या मंडळाची बसका जाली. हे बसकेक देशभरांतल्यान नांव आयिल्लीं. हातुंतल्यान २०२२ आनी २०२३ ह्या वर्साच्या पुरस्कारां खातीर नांवां निश्चीत केल्लीं. हातूंत संगीत नाटक अकादमी फेलोशिप (अकादमी रत्न), संगीत नाटक अकादमी पुरस्कार आनी उस्ताद बिस्मिल्ला खॉं युवा पुरस्कार हांचो आसपाव आसा.
संगीत नाटक अकादमी फेलोशिप (अकादमी रत्न) हो सर्वोच्च पुरस्कार भारतांतल्या वट्ट स दिग्गज कालाकारांक भेटयलो. हातूंत गोंयचे लोकवेदाचे अभ्यासक विनायक खेडेकार हांचो आसपाव आसा. तांकां पुरस्कारांच्या रुपांत ३ लाख रुपया दितात. तशेंच हिंदुस्थानी शास्त्रीय गायनांत देवकी पंडित- नांबियार हांकां २०२२ खातीर अकादमी पुरस्कार जाहीर जाला.
संगीत नाटक अकादमी पुरस्कार
संगीत नाटक अकादमी पुरस्कार : २०२३ त परंपरीक लोकनाच, लोकसंगीत, आदिवासी नाच आनी अभिनयांत ११ जाणांक पुरस्कार भेटयल्यात. हातूंत गोंयचे लोकसंगीतकार कांता गावडे हांची निवड जाल्या. तांकां पुरस्काराच्या रुपांत १ लाख रुपया भेटयतले. ह्याच पुरस्कारां खातीर संगीतांत १२, नाचांत १२ आनी अभिनयांत ९ कलाकारांक पुरस्कार दितले. जाल्यार दोगांक शिश्यवृत्त्यो भेटयतले.
उस्ताद बिस्मिल्ला खॉं युवा पुरस्कार
ह्या पुरस्कारा खातीर परंपरीक कला प्रकारांत ११ जणांक पुरस्कार भेटयल्यात. हातूंत लोकनाचांत महेश सतरकार हांकां जाल्यार अभिनयांत सिद्धी उपाध्ये हांकां पुरस्कार जाहीर जाल्यात. शाल, ताम्रपट आनी २५ हजार रुपया रोख अशें ह्या पुरस्काराचें स्वरूप.
हे पुरस्कार भारतीय संगीत, नाच, अभिनय, लोकसंगीत, लोकनाच, आदिवासी नाच ह्या विभागांत उत्कृश्ठ काम करपी कलाकारांक दितात. तशेंच अकादमीच्यो शिश्यवृत्त्योय दितात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
