भांगरभूंय | प्रतिनिधी
फर्मागुडयेर टाटा स्ट्रायव्ह कुशळटाय केंद्राचें उक्तावण
फोंडें: गोंयांत खाजगी मळार व्हड प्रमाणांत संदी उपलब्ध आसात, आनी येता ते 15 जुलय मेरेन सुमार 10 हजार तरणाट्यांक प्रशिक्षणार्थीची संद दितले. तरणाट्यांनी संदीचो लाव घेवन स्वताची कुशळटाय दाखोवपाची गरज आसा अशें मुख्यमंत्री डॉ. प्रमोद सावंत हांणी सांगलें.
फर्मागुडयेर फोंडें शिक्षण संस्थे वतीन (पीईएस) सुरू केल्ल्या टाटा स्ट्रायव्ह कुशळटाय केंद्राच्या उक्तावणा वेळार मुख्यमंत्री डॉ. प्रमोद सावंत उलयताले. ह्या वेळार शेतकी मंत्री आनी फोंडें शिक्षण संस्थेचे अध्यक्ष रवी नायक, सचीव आनी फोंडें पालिकेचे नगराध्यक्ष रितेश नायक, सरपंच हर्षा गावडे आनी टाटा स्ट्रायव्हचे अनिता राजन माचयेर हाजीर आशिल्ली.
नवभारत निर्माण करपा खातीर सरकार कुशळटाय मळार चड भर दिता. ते खातीर तरणाट्यांक व्हड प्रमाणांत संदी उपलब्ध जातल्यो. उच्च शिक्षण घेतले उपरांत नोकरी सोदपाची वेळ येता. पूण कुशळटाय प्राप्त केल्ल्या तरणाट्यांक रोजगारांच्यो चड संदी उपलब्ध आसात. तेच बरोबर पर्यटन मळार कुशळटाय आशिल्ल्या तरणाट्यांक रोजगारांच्यो संदी उपलब्ध आशिल्ल्याचें मुख्यमंत्री डॉ. प्रमोद सावंत हांणी सांगलें.
ह्या वेळार अनिता राजन आनी नगराध्यक्ष रितेश नायक हांणी आपले मनोगत उक्तायलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
