भांगरभूंय | प्रतिनिधी
हवामान खात्या कडल्यान ‘यलो अलर्ट’
पणजी, बातमीदार ः हवामान खात्यान काल फुडले कांय दीस तापमान चडेंच उरतलें आनी दोन दीस हवामान ढगाळ उरतलें असो अदमास काडिल्लो. तशेंच पावस पडपाची शक्यताय ना असोय उल्लेख केल्लो. पूण आयज सकाळीं सावन उत्तर आनी दक्षिण गोंयांत कांय वाठारांनी नेटाचो पावस पडपाक सुरवात जाल्या. ते प्रमाण पणजी हवामान खात्यान रोखडोच यलो अलर्ट जारी केलो.
गोंयांत 19 ते 21 एप्रील मेरेन राज्यांतलें हवामान उश्ण आनी दमट आसतले. तशेंच आयज आनी फाल्यां वातावरण ढगाळ आसपाची शक्यताय आसा. पूण पावस पडपाची शक्यताय ना. जाल्यार 22 ते 25 एप्रील ह्या काळांत हवामान सुकें उरपाची शक्यताय आसा असो अदमास काल दनपारां पणजी हवामान खात्यान दिल्लो. पूण, गोंयच्या चडशा वाठारांनी दमट वातावरण जावन सकाळीं सावन पावस पडपाक सुरवात जाल्या. पणजे सकाळच्यान व्हडलो पावस पडटा.
मजगतीं, पणजे हवामान खात्यान पावस पडपाची शक्यताय ना असो अदमास काडिल्लो. पूण आयज सकाळीं गोंयच्या चडश्या वाठारांनी नेटाचो पावस पडलो. पणजे तर सकाळीं १० ते ११,३० मेरेन सुमार देड वर वाऱ्या सयत पावसाची व्हडली दडक पडली. पावसाक लागून हवामान खात्याचो अदमास कित्याक चुकलो, असो प्रस्न निर्माण जालो. गोंयच्याच मळबांत अचकीत कुपां तयार जावन हो पावस पडलो. हेर राज्यांच्या वाठारांत कुपां तयार जाल्लीं, जाल्यार पावसाची शीटकावणी दिवप शक्य आसले अशें संचालक आनी पणजे वेधशाळेचे मुखेली नहुश कुलकर्णी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
