भांगरभूंय | प्रतिनिधी
मडगांव, प्रतिनिधी: रवींद्र भवन, मडगांवा वतीन बायलां दिसा निमतान आयोजीत केल्ले संगीत मैफली खातीर चारां मदले तीन गायक महाराष्ट्रांतले आसात. हाचो निशेध करून बायलां दिसा आयोजीत कार्यावळीक गोंयच्या कलाकारांक कला सादर करपाची संद दिवची अशी मागणी कॉंग्रेस फुडारी आनी जिल्हो पंचायत वांगडी मिशेल रिबेलो हांणी आयज केली.
बायलां दिसाचे कार्यावळी विशीं रवींद्र भवनाचे अध्यक्ष राजेंद्र तालक हांणी केल्ले घोशणेचेर प्रतिक्रिया उक्तायतना मिशेल रिबेलो हांणी गोंयच्या कलाकारां कडल्यान कमिशन मेळनाशिल्ल्यान तांकां सादरीकरणाची संद दिनात, असो गंभीर आरोप केलो. हे कार्यावळीक साधना सरगम, वैशाली सामंत आनी आनंदी जोशी हांचें गायन जातलें. हीं सगळीं महाराष्ट्रांतलीं. गोंयची नाइटिंगेल लोर्ना वा हेमा सरदेसाय हांकां कित्याक आमंत्रण दिवंक ना? गोंयच्या हेर गायकांक कित्याक संद दिवंक ना? असो प्रस्न मिशेल रिबेलो हांणी विचारलो.
साश्टीच्या आमदारांच्यो शिफारसी गरजेच्यो
मडगांवचे रवींद्र भवन पुराय साश्ट म्हाला खातीर आसा. मडगांव नगरपालिका वाठारांत येवपी मतदारसंघांतल्या फकत तीन आमदारांनी शिफारस केल्ल्या तियात्रांकूच राजेंद्र तालक सभाघर कशें दिवपाक शकतात? साश्टीच्या सगळ्या आमदारांच्यो शिफारसी तांणी घेवपाक जाय आशिल्ल्यो, अशें मिशेल रिबेलो हांणी सांगलें.
रवींद्र भवन, मडगांव हें राजकी पुनर्वसन केंद्र जालां. कार्यकारिणीचेर नियुक्त जाल्ल्या वांगड्यांक कला आनी संस्कृतीचें मोल ना. कला आनी संस्कृतीकडेन संबंदीत दरेका वांगड्यांची म्हायती सरकारान उक्ती करपाची मागणी तिणें केली. रवींद्र भवनाचे अध्यक्ष राजेंद्र तालक हांचे संगीत आनी नाचाचे वर्ग घेवपी एके खाजगी संस्थे कडेन संबंद आसात. ताका लागूनच रवींद्र भवनांत संगीत, नाच आनी नाट्य प्रशिक्षण वर्ग सुरू करपाची तांची तयारी आसा, अशें मिशेल हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
