गोंयच्या ‘आयुष’ मळार १६०० दोतोर, ३ महाविद्यालयां

भांगरभूंय | प्रतिनिधी

पणजीः गोंयांत १६०० दोतोर ‘आयुष’ मळाचेर वावुरतात. चडशे दोतोर होमयोपॅथी हे आयुष श्रेणीत कार्यरत आसात. तशेंच आयुष मळार वैजकी अभ्यास करपी ४ विद्यार्थ्यांक आयुष मळार संसोधना खातीर स्पार्क हे पुरस्कार फावो जावन तांकां विध्यार्थीत्व मेळ्ळां. तशेंच आयुष मळार प्रचार करपा खातीर राज्यांत ३ आयुष महाविद्यालयां आसात, अशी म्हायती केंद्रीय आयुष मंत्रालयान दिल्या.
लोकसभेच्या पटलार लेखी जाप दितना केंद्रीय आयुष राज्य मंत्री प्रतापराव जाधव हांणी सांगलें, गोंयांत १६३४ आयुष दोतोर आसात, ३ आयुष महाविद्यालयां, २०७ आयुष फार्मासी आसात.
१६३४ आयुष दोतोरां मदले सगळ्यांत चड ८८२ दोतोर हॉमयोपेथी उपचार दितात, ७५१ आयुर्वेद उपचार आनी एक दोतोर नेच्युरोपॅथी उपचार दितात. उन्नांनी, सिध्दा, सोवा रिग्पा ह्या मळार एकूय दोतोर नात. तशेंच आयुष उपचार पध्दतींचो अभ्यास दिवपी ३ महाविद्यालयां गोंयांत आसात. तातुंतल्यो २ आयुर्वेद आनी १ होमयोपॅथी संस्था आसा. राज्यांत १०७ आयुष फार्मासी आसात. तातुंतल्यो १४० आर्युवेद फार्मासी आनी ६७ हॉमयोपॅथी फार्मसी आसात. हेर आयुष मळार एकूय फार्मसी ना.
जाल्यार आयुष शिक्षणीक मळार आयुष मंत्रालयां स्पार्क ही विद्यार्थीवृत्ती पुरस्कार प्रदान करता. हे येवजणे खाला आयुष शिक्षण घेवपी ४ विद्यार्थ्यांक हो पुरस्कार फावो जाला. दरेकी विद्यार्थ्यांक रु. ५० हजार इतलें इनाम मेळ्ळां आनी वट्ट रु. २ लाख हे पुरस्काराचेर आयुष मंत्रालयान खर्च केल्या. तशेंच मंत्रालयाची पोस्ट-डोक्टरल फेलोशिप येवजण आसा. हे येवजणेचो फक्त एकूच आयुषचें शिक्षण घेवपी विद्यार्थ्यान लाव घेतला तो सुध्दा २०२२वर्सा. उपरांत एकय विद्यार्थ्यांक ही फेलोशिप मेळूंक ना.