भांगरभूंय | प्रतिनिधी
पणजी : आम आदमी पक्षान (आपान) दिल्लींतल्या सोर्याच्या घोटाळ्याचे सुमार ४५ कोटी रुपया गोंय विधानसभा वेंचणुकेक वापरिल्ले, असो दावो केल्या उपरांत ‘ईडी’न आपचे गोंयचे फुडारी अमित पालेकार, रामराव वाघ हांचे सयत अखील गोंय भंडारी समाजाचे अध्यक्ष अशोक नायक आनी भंडारी समाजाचे फुडारी दत्तप्रसाद नायक हांकां समन्स जारी केल्यात. ह्या चवगांकूय बिरेस्तारा ‘ईडी’च्या कार्यालयांत आपयल्यात.
हालींच दिल्लीचे मुख्यमंत्री तशेंच आपचे राष्ट्रीय संयोजक अरविंद केजरीवाल हांकां ‘ईडी’न दिल्लींत सोरो घोटाळो प्रकरणांत अटक केल्या. उपरांत ह्या प्रकरणा कडेन संबंदीत आशिल्ल्यांचेरूय कारवाय करपाची प्रक्रिया ‘ईडी’न सुरू केल्या. ह्या घोटाळ्यांतल्यान जे पयशे मेळ्ळ्या, तातूंतले सुमार ४५ कोटी रुपया आपान गोंयचे विधानसभा वेंचणुकेंत खर्च केल्ल्याचो दुबाव उक्तावन ‘ईडी’न आपचे गोंय निमंत्रक अमित पालेकार, पदाधिकारी रामराव वाघ हांचे सयत भंडारी समाजाचे अध्यक्ष अशोक नायक आनी दत्तप्रसाद नायक ह्या चवगांकूय समन्स दिवन बिरेस्तारा चवकशे खातीर हाजीर रावपाक सांगलां. ‘ईडी’च्या निर्देशा प्रमाण आमी बिरेस्तारा चवकशे खातीर हाजीर रावतले अशी म्हायती पालेकार हांणी बुधवारा रातची सोशल मिडिया वरवीं दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
