भांगरभूंय | प्रतिनिधी
अन्याया आड आवाज उठोवपाक तरणाट्यांक उलो
पणजी: भंयान जर तरणाटे ओगी रावले जाल्यार समाजाचो फुडार काळखांत वतलो. तरणाट्यांचो आवाज होच बदलाचो खर उगम आसा. लोकशाय मार्गान आवाज उठोवपांत खंयचोच भंय बाळगुपाची गरज ना,” अशें निवृत्त न्यायमूर्ती फेर्दिन रिबेलो हांणी सांगलें.
‘इनाफ इज इनाफ’ चळवळी वतीन घडोवन हाडिल्ल्या तरणाट्यांच्या संवादाचे एके कार्यावळींत ते उलयतालें. न्यायमूर्ती रिबेलो हांणी गोंयच्या तरणाट्यांक शिटूक रावपाक, अन्याया आड प्रस्न उबे करपाक आनी गोंयचो फुडार घडोवपांत सक्रिय वांटो घेवपाक सांगलें.
आपल्या जिणेंतल्या एका प्रसंगाचो उगडास करून रिबेलो हांणी सांगलें, पारंपरिक खारवी समाजाच्या प्रस्नांचेर जाल्ल्या एका आंदोलनांत वांटो घेतिल्ल्यान तांकां एकदां आग्वाद बंदखणींत 3 दीस काडचे पडिल्ले. म्हणून हांव फाटीं सरलो ना. मागीर हांव न्यायमूर्ती जावंक शकलो. देखून लोकशाय मार्गान आवाज उठयल्यार आपलें करियर वा फुडार पाड जातलो, असो खंयचोच भंय तरणाट्यांनी मनांत बाळगुचो न्हय, अशेंय तांणी सांगलें.
बोगस कागाळी आनी दबावाचें तंत्र केन्ना केन्ना आडखळीं हाडूंक शकता, हें मान्य करून अन्याया आड उबे रावपाची धिटाय काळजा सावन येवपाक जाय. बंड वा क्रांती ही संबंदीत व्यक्तीची आत्मिक तोखणाय, तळमळ आनी इत्सा शक्तीचेर आदारून आसता, अशेंय तांणी फुडें सांगलें.
गोयांत जावपी घडामोडींचेर तरणाट्यांनी बारीक नदर दवरपाक जाय. ‘इनाफ इज इनाफ’ चळवळीन तयार केल्ल्या नागरिकांच्या 10 मागण्यांच्या सनदेचेर तरणाट्यांनी गंभीर चर्चा करची. चुकीच्या आदर्शांचें अनुकरण केल्ल्यान समाज दिशाहीन जाता, देखून वेवस्थेक प्रस्न विचारप गरजेचें आसा, अशी शिटकावणी तांणी दिली.
जंय जंय चूक जाता, भ्रश्टाचार जाता, थंय जापो मागप आमचें कर्तव्य. भंयाचे सांवळे खाला जियेंवचें काय आपल्या हक्का खातीर उबें रावचें, हें दर एकल्यान थारावपाक जाय. तरणाट्यांनी फकत प्रेक्षक उरनासतना लोकशाय प्रक्रियेत सक्रिय वांटेकार जावचें, अशी मागणी तांणी केली. तरणाट्यांनी ‘इनाफ इज इनाफ’च्या संवादांनी वांटो घेवपाक जाय. लोकशायेंत संवाद, उलोवणी, तर्क आनी वाद-विवाद खूब म्हत्वाचें आसात. जेन्ना तरणाटे राज्याचे निर्णय घेवपाच्या प्रक्रियेत म्हत्वाची भूमिका घेवपाक लागतात, तेन्नाच समाज योग्य दिकेन फुडें वता,” अशेंय रिबेलो हांणी सांगलें.
कार्यावळीचें संयोजन एल्विस गोम्स हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
