भांगरभूंय | प्रतिनिधी
गोंय क्रिकेट संघटणेच्या स्पर्धात्मक क्रिकेटीच्या इतिहासांत सगल्यांत व्हड लजेक घालपी हार काल गोंयच्या क्रिकेट पंगडाक सोंसची पडली. गोंयच्या 15 वर्सां पिराये सकयले चलयांचो क्रिकेट पंगडाचो डाव फकत 8 धांवड्यांचेर सोंपलो. बंगाला आडची ही मॅच झाज्जरच्या चौधरी बन्सीलाल क्रिकेट स्टेडियमाचेर जाली. गोंय पंगडान आठांतल्यो फकत चार धांवड्यो धांवन काडल्यो.
गोंयचो डाव दोट्टी धांवड्यां पयलींच बाद करपाचो पराक्रम काल बंगालाच्या चलयांच्या पंगडान केलो. गोंयचो डाव 9.2 ओव्हरींनी म्हणल्यार 56 बॉलांनी 8 धांवड्यांचेर गुठलायलो. अशे तरेन गोंयाक वट्ट 266 धांवड्यांनी हार घेवची पडली. घडये ही बीसीसीआयचे 15 वर्सां पिराये सकयले चलयांचे क्रिकेटींतलो सगल्यांत उणो स्कोर आसुये.
गोंयच्या सात बॅटरांक खातें लेगीत उगडपाक जमलें ना. किमया पाठकान धांवबाद जावचे पयलीं सगल्यांत चड म्हणल्यार 2 धांवड्यो केल्यो. ते उपरांत विधी भंडारे आनी नंदिनी चौहान हिणें दरेकी एक धांवडी केली. चार अतिरिक्त धांवड्यो आशिल्ल्यो. बंगाला वतीन अंजली बर्मनान स विकेटी घेतल्यो, जाल्यार संदीप्ता पात्रान तीन विकेटी मेळयल्यो.
थोडे भितर धांवतकटोः बंगाल, 35 ओव्हरींनी 3 बाद 274 धांवड्यो ( अभिश्रुती धर 14, अरित्रिका 15, इप्सिता मोंडल नाबाद 79, प्रियांका गोल्डर 40, संदीप्ता पात्रा नाबाद 51 धांवड्यो, दिप्ती भोसले 6-0-69-1, विधी भंडारे 7-0-36-1) जैत आड गोंय, 9.2 ओव्हरींनी सगले बाद 8 धांवड्यो ( गायत्री 0, दिलेशा डिचोलकार 0, विधी भंडारे 1, दिशा देसाय 0, एम नस्सार 0, प्रगती भोसले 0, किमया पाठक 2, नंदिनी चव्हाण 1, तन्वी गांवस 0, तनिशा वेळीप नाबाद 0, सान्वी म्हांबरे 0, अंजली बर्मन 4.2-3-3-6, संदिप्ता पात्रा 4-2-2-3).
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
