भांगरभूंय | प्रतिनिधी
वेंचणूक सेवे खातीर गेल्ले गुजरातांत
म्हापशें: लोकसभा वेंचणुकेचे सेवे खातीर राजस्थानांत आनी थंय सावन आतां गुजरातांत गेल्ल्या गोंयांतल्या आयआरबी पुलीस पंगडांतल्या कर्मचाऱ्यांक पोस्टल बॅलटा वरवीं मतदानाचो हक्क बजावप शक्य जावचें ना. ताका लागून सुमार 920 आयआरबी पुलीस कर्मचारी अंदूं मतदानाचो हक्क बजावपा पसून वंचीत उरपाची शक्यताय आसा.
ह्या आयआरबी बटालियन पंगडांत एक उपअधिक्षक, 10 निरिक्षक, 10 उपनिरिक्षक, 20 सहाय्यक उपनिरिक्षक तशेंच हवालदार आनी पुलीस कॉन्स्टेबल मेळून 920 कर्मचाऱ्यांचो आस्पाव आसा. ह्या पंगडाक वेंचणूक सेवे खातीर राजस्थानांत धाडून दिल्ले. थंय सावन तांकां थेट गुजरातांत सेवेचेर धाडून दिले. गोंयांतल्या मतदाना वेळारूच गुजरातांत मतदान जावपाचें आसा.
वेंचणूक सुदारीत कायदो नेमा प्रमाण ज्या सरकारी कर्मचाऱ्यांक पोस्टल बॅलटा वरवीं मतदान करपाक शक्य ना, अशा कर्मचाऱ्यांक येता त्या 3 ते 5 मे मजगतीं संबंदीत वेंचणूक अधिकाऱ्यां मुखार मतदान करपाची वेवस्था केल्या. पूण वयलो पंगड हो गुजरातांत सेवा थळार आसा. तांकां ह्या सुविधेचो लाव घेवप शक्य जावचें ना.
आयआरबी पुलीस दळा कडल्यान हे विशींची म्हायती मेळटकूच गोंयच्या मुख्य वेंचणूक अधिकाऱ्यांनी मुख्य वेंचणूक आयुक्तां कडेन संपर्क सादला. पूण अजून हे समस्येचेर कसलोच उपाय काडिल्लो ना. ताका लागून ह्या भारतीय राखीव बटालियनाच्या पुलीस कर्मचाऱ्यांक मतदानाच्या हक्का पसून वंचीत उरचें पडटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
