भांगरभूंय | प्रतिनिधी
पणजी ः मुळ गोंयकार आनी म्हाराश्ट्रांत रावपी डॉ. जहीर काझी हांका पद्मश्री पुरस्कार जाहीर जालां. डॉ. काझी वैजकी मळार प्रवेश घेतिल्ले गोंयांतल्या मुसलमान समाजांतले पयले विद्यार्थी आनी ह्या समाजांतले पयले दोतोर.
मुळ फोंडेंच्या डॉ. काझीन वैजकी शिक्षण बांबोळीच्या गोंय वैजकी म्हाविद्यालयांत पुराय केलें. गोंयांत एमबीबीएस पुराय करून ते मुंबय रावपाक गेले आनी थंयच तांणी सेवा दिवपाक सुरवात केली. डॉ. काझी हांचो भाव उद्देगीक उदरगत म्हामंडळांत (आयडीसी) काम करता.
डॉ. काझी हांका शिक्षणाच्या मळार केल्ल्या उत्कृश्ट योगदाना खातीर पद्मश्री हो पुरस्कार फावो जाला. गरजेवंत विद्यार्थ्यां खातीर काम करपी 150 वर्सां पोरन्या संघटनेच्या अंजुमन ई इस्लाम हे संस्थेचो ते अध्यक्ष आसात. गोमेकॉ कडल्यान आपणाक खूब कितें शिकपाक मेळ्ळें. गोमेकॉन दिल्ल्या संदीक लागूनच आयज आपूण संवसारांत एक तज्ञ रेडिओलॉजिस्ट म्हणून भोंवता अशें डॉ. काझी अभिमानान सांगतात. गोंय आनी कोंकणी भाशेचो हांव ऋणी आसा अशेंय ते म्हणटा.
अंजुमन ए इस्लाम ह्या संस्थेच्यो ९७ इन्स्टिट्यूट आसात. हातूंतल्यान सुमार 1 लाख गरजेवंत विद्यार्थ्यांक शिक्षण मेळटा. हाचे भायर हे संस्थे वरवीं अनाथालयाय चलयतात. तातूंत सुमार ४०० भुरगीं रावतात.
ही संस्था बेगीनूच गोंयांतय तंत्रीक शिक्षण, कुशळटाय विकास आनी हेर वेवसायीक प्रशिक्षण दिवपी शिक्षणीक संस्था सुरू करतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
