भांगरभूंय | प्रतिनिधी
12 हजार शेतकारांनी घेतलो सरकाराच्या येवजणेचो लाव
समीप नार्वेकार । भांगरभूंय
गोंयची 10 हजार हॅक्टर शेत जमीन सेंद्रीय पद्दतीच्या लागवडी खाला आयल्या. 12 हजार परस चड शेतकारांनी राज्य आनी केंद्र सरकाराचे मजतीन आपली शेती आनी भाटां सेंद्रीय पद्धतीन रोवपांक सुरू केला, अशी म्हायती शेतकी संचालनालयान दिल्या.
परंपरागत कृषी विकास येवजण हे केंद्राचे येवजणे खाला गोंयांत सेंद्रीय पद्धतीन शेती आनी भाटां रोवपां खातीर चालना मेळपा खातीर राज्य सरकारान यत्न चालू केल्यात. 2019-20 त हे येवजणे अंतर्गत गोंयात सेंद्रीय पद्दतीन शेती रोवपांक सुरवात जाल्ली. पुण मदींच कोवीड आयिल्ल्या कारणांन हे येवजणेक आडखळ आयली. आतां परत ही येवजण नेटान चालीक लागल्या, अशी म्हायती शेतकी अधिकाऱ्यांनी दिली.
सेंद्रीय शेत पद्दतीक प्रोस्ताहन मेळचें म्हण केंद्र सरकारा बरोबर राज्य सरकाराय निधी दिता. परंपरागत कृषी विकास येवजणे अंतर्गत केंद्र सरकार शेतकी खात्याक निधी धाडटा, ते भायर राज्य सरकार सेंद्रीय माक्ना घेवपाक, सोयल कंडीशनराच्या वापरा खातीर, वर्मीकम्पोस्ट आनी सेंद्रीय युनिट उबारपा खातीर राज्य सरकार निधी दिता.
गेले वर्सा 2022-23 त सरकारान सेंद्रीय माक्ना घेवपांक 20 लाख इतलो निधी दिल्लो. 2023- 22 त तातुंत वाड जावन तो 38 लाखांचेर पावला. पुण सेंद्रीय माक्ना, सोयल कंडिशनर, वर्मीकम्पोस्ट आनी सेंद्रीय खात्याच्या युनिटांत येवपी निधीत उणाव जाल्लो दिश्टी पडटा. 2022-23 त हो निधी साडे सात लाख आसलो तो आतां देवन 2022-24 त साडे तीन लाख इतलो जाला.
हाचेर जाप दितना शेतकी अधिकाऱ्यांन सांगलें की सरकारा कडल्यान येवपी निधीत उणाव जांवकना. आमकां जाय तितलोच निधी आमी सरकारा कडे मागतात. शेतकारांनी गरजे प्रमाण हीं माक्नां आनी सुविधा घेतल्यात आनी अंदूं चड शेतकारांक ताची गरज ना देखून आमी कमी निधी हे फावट सरकारा कडल्यान मागला, अशे अधिकाऱ्यांनी सांगलें.
ते भायर सेंद्रीय माक्ना घेवपां खातीर आमी अतिरीक्त निधीची मागणी केल्या. हो निधी 38 लाखां वेल्यान आतां 68 लाख मेरेन पावतलो. ते भायर केंद्र सरकारा कडल्यान शेतकी खात्याक परंपरागत कृषी विकास येवजणे अंतर्गत 5.72 कोटी आयल्यात. तातुंतले आमी चार कोटी शेतकाराच्या फायद्या खातीर मोडल्यात. 1.45 कोटी उरल्यात. उरिल्ल्या निधीचो वापर जातकच केंद्र सरकार परत नवो निधी धाडटलें, अशे अधिकाऱ्यांन सांगलें.
गोंयां भितर आमी 500 क्लस्टर तयार केल्यात. थंय 1600 शेतकरांनी आपली 10 हजार हेक्टर शेती सेंद्रीय पद्दत वापरून पिकावळ काडल्या. रसायनाच्या खतांचो वापर भायरावन पुराय शेण, पालो, सोयल कंडीशनर आनी सुक्ष्मजंतू वापरून खत तयार करप हांका सेंद्रीय शेती म्हणटांत. काजू, आमे, माड, पोरसूं हे सारिकिल्ल्या शेतां आनी भाटांनी सेंद्रीय पद्दत चालीक लागल्या, अशे शेतकी संचालक नेव्हील आफोन्सो हांणी सांगलें.
एक शेत रसायनिक पद्दतींतल्यान सेंद्रीय शेतांत रुपांतर करपांक बरींच वर्सां लागतात. पयलीं सहभाग हमी येवजणे अंतर्गत शेतकार सेंद्रीय पद्दतीचो आस्पाव करता. उपरांत खात्याची आदार एजन्सी तांकां प्रशिक्षण दिवन मार्गदर्शन करता. मदींच प्रादेशिक मंडळ तांच्या शेतांक अचकीत भेट दिता. शेतांत सेंद्रीय पद्दतीन वापर जायना काय ना हें थारयल्या उपरांतच त्या शेताची नोंदणी जाता. हे प्रक्रियेक वट्ट तीन वर्सा लागतात, अशें शेतकी संचालकांन सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
