भांगरभूंय | प्रतिनिधी
दर्यादेगांचेर इंटरनेटा सयत तयार जातल्यो हेर सुविधा
भांगरभूंय । प्रतिनिधी
पणजी : गोंयच्या दर्यादेगांचो वापर ह्यान फुडें पर्यटनासयत वेवसाया खातीर लेगीत जावचो म्हूण मुळाव्यो सुविधा निर्माण करपाचो वावर सुरू आसा. ह्यान फुडें गोंयची वळख पर्यटना सयत ‘वर्क फ्रॉम बीच डेस्टिनशन’ अशी जावपाची आसा. हे दिकेन गोंयची वाटचाल सुरू आसा, अशें मुख्यमंत्री डॉ. प्रमोद सावंत हांणी सांगलें.
बागा हांगा गोवा शॅकथॉन 2026चे उक्तावण मुख्यमंत्री डॉ. प्रमोद सावंत हांचें हस्तुकीं जालें. ह्या वेळार ते उलयताले. म्हायती तंत्रज्ञान खात्याचे मंत्री रोहन खंवटे, आमदार मायकल लोबो आनी हेर मानेस्त उक्तावणाक हाजीर आशिल्लें. जेन झीचे (तरणाटे पिळगेक) विचार बदलत आसा. वेवसाय वा नोकरी करता आसतना तांका शांतिकाय, समाधान तशेंच फ्लेक्झीबीलीटी जाय. कोरोना वेळार वर्क फ्रॉम होम ही संकल्पना तयार जाली. गोंयांत आतां वर्क फ्रॉम बीच ही संकल्पना तयार जावची म्हूण यत्न आसा. कोलवा दर्यादेगाचेर इंटरनेट तशेंच हेर सुविधा उबारपाचो वावर सुरू जाला. हेर दर्यादेगांचेर लेगीत इंटरनेटा सयत हेर सुविधा निर्माण जातल्यो. हाका लागून दर्यादेगांचेर येवपी पर्यटकांच्या हातांत बियरी सयत लॅपटॉप लेगीत दिश्टी पडटले, अशें मुख्यमंत्री डॉ. प्रमोद सावंत हांणी सांगलें.
तरणाट्यांनी नोकऱ्यो मेळोवपाचो यत्न करी नासताना नोकऱ्यो तयार करपी एंत्रेप्रेनर जावपाचो यत्न करपाक जाय. स्वयंपूर्ण गोंय मोहीमे सयत सरकारान स्टार्टअप धोरण तयार केलां. गोंयांत 34 स्टार्टअपा सुरू जाल्या. ह्या स्टार्ट अपाक 4.10 कोटींचें अर्थीक साहाय्य दिलां. तरेकवार येवजण्यो आनी सुविधांचो लाव घेवन तरणाटे वर्क फ्रॉम बीच डेस्टिनेशन ह्या संकल्पनेक फुडें व्हरपाक सहकार्य करतलें, अशी आस्त मुख्यमंत्र्यांनी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
