भांगरभूंय | प्रतिनिधी
देशांत गल्ली सावन दिल्ली मेरेन निर्शेल्ल्या विरोधकांच्यो आड्ड्यो सुरू आशिल्ल्याचें चित्र दिसतना, कित्याक काय कळना, पूण राजकी रणांगणा पसून एक सप्तक पयस रावन खेळा मैदानार पासय मारपाचो विचार मनांत आयलो. घोटाळ्याच्या दीर्घ पर्वा उपरांत गोंयच्या क्रिकेट मळाचेर खऱ्यानींच सकारात्मक गजाली घडपाक लागल्ल्याचें दिशिल्ल्यान ताची दखल घेवप सहाजिकूच आशिल्लें. गोंयच्या क्रिकेटक आतां कोणूय वाली उरिल्लो ना, अशें फाटल्या कांय वर्सांतल्या घडणुकां वयल्यान दिसतालें. मात, पोरूं वर्स भरयां गोंयचे क्रिकेटीन कात उडयल्या अशें तर दिसून येताच, पूण त्याच वांगडा गोंयचें क्रिकेट आनी एकूण खेळां मळूय उमेदी तशेंच घटमूट अशा लोकांच्या हातांत आयिल्ल्यान लागींच्या फुडाराक गोंयच्या खेळां मेळार चड करून क्रिकेटीच्या मळार बरी कामगिरी जातली अशी आस्त बाळगुपाक जाता. अंदुंच्या सिझनांत आमच्या रणजी पंगडान जी कामगिरी केली ती निश्चितूच तोखणाय करपा सारकी आसा. नशीबाचो मात्सो वांगड मेळिल्लो जाल्यार घडये आमचो रणजी पंगडा सर्तीचे बाद फेरयेंत पाविल्ल्याची संद आमकां मेळनाशिल्ली. आमचे शिखा पांडेय बायलाच्या आयपीएलांत चमकता हें आमी ह्या दिसांनी पळयतात. तेन्नाय गोंयच्या क्रिकेटीक नवे मोडण मेळपाची कोणेय अपेक्षा केल्यार तातूंत वेगळे अशें कांय ना. गोंयच्या बायलां खातीर प्रीमियर लीग सुरू करपाचो गोंय क्रिकेट असोसिएशनान (जीसीए) घेतिल्लो निर्णय येवकार दिवपा सारको.
जीसीएचें फुडारपण सध्या विपुल फडके आनी रोहन देसाय ह्या दोन तरणाट्यां कडेन आसा. फाटल्या कांय वर्सांत घोटाळ्यांच्या चक्रांत सामकें आडकून पडिल्ल्या गोंयचे क्रिकेटीक त्या चक्रांतल्यान भायर काडून नवी दिका दाखोवपाचें काम ह्या दोगांकूय हेर वांगड्यां वांगडा करपाचें आसा आनी अंदूचे रणजी सर्तींत आमच्या पंगडान सामकी बरी ना तरी समाधानकारक म्हणपा सारकी जी कामगिरी केली, ताचें स्रय तांकांच दिवचें पडटलें. गोंयच्या क्रिकेटी विशीं कितें बरें बरोवपाक मेळटलें, अश्यो गजाली फाटल्या वर्सांत चडश्यो जाल्ल्यो नात हें जरी खरें आसलें तरी फाटल्या काळांत रमनासतना जीसीएचो अध्यक्ष विपुल फडके आनी सचीव रोहन देसाय ह्या दोगांनीय क्रिकेटीच्या बऱ्या फुडारा खातीर कांय येवजण्यो तयार केल्यात अशें दिसता. तांका येवकार दिवचो पडटलो. गोंयांक रणजी दर्जो मेळून पांचेक दशकांचो तेंप उलगला, पूण भारतीय क्रिकेटीक अजूनय आमी एकूय खेळगडो दिवपाक शकले ना हें आमी विसरपाक जायना. क्रिकेटी खातीर गोंयांत पोशक अशें वातावरण आसतनाय आमचे क्रिकेटीची वाड जायना. अशे परिस्थितींत जीसीएच्या तरणाट्या नेतृत्वाक कांय ठोस येवजण्यो घेवन फुडें वच्चें पडटलें… आनी तांची सध्याची उमेद पळयल्यार तांचे कडेन ती धमक निश्चीतच आसा, अशें दिसता. जीसीएच्या हालींच जाल्ले साबार बसकेंत ह्या दोगांनीय गोंयचे क्रिकेटीच्या फुडारा खातीर जो रोडमॅप थारयला ते खातीर तांकां पुराय तेंको दिवपाची गरज आसा.
गोंयच्या रणजी पंगडाचे अंदूंचे कामगिरीचो नियाळ घेवपाचो जाल्यार फुडल्या एक- दोन वर्सांत हे सर्तीचे बाद फेरयेंत खेळपाची आस्त आमकां बाळगुवपाक जाता. सुयश प्रभुदेसाय, कॅप्टन दर्शन मिशाळ, मोहित रेडकार, इनान गडेकार, आमचो सोयरो खेळगडो अर्जुन तेंडुलकार ह्या सगळ्यांचींच कामगिरी बरी जाल्ल्यान आमचो दर्जो सुदारिल्ल्याचो निश्कर्श तातूंतल्यान काडपाक जाता. कामगिरींत मात्शें सातत्य दिसून आयिल्ले जाल्यार वट्ट निकालांत बरोच फऱक पडटाशिल्लो. पूण एके रातींत ह्यो गजाली घडून येनात. क्रिकेटींत जाल्यार सातत्यशील कामगिरीक पर्याय आसना. हाचो फायदो फुडल्या वर्सांनी आमकां नक्कीच जावपाक शकतलो आनी ह्या खेळगड्यां कडल्यान चड बरी कामगिरी करून घेवपाक जीसीएकूय यत्न करीत रावचें पडटलें. शदाब जकाती उपरांत दर्शन मिशाळाच्या रुपान एक बरो बॉलर तर मेळ्ळाच त्याच वांगडा आपूण एक बरो बॅट्समन आशिल्ल्याचें दर्शनान बॅटिंगेंतल्यान दाखोवन दिलां. 436 धांवड्यो आनी 22 विकेटी हे दर्शनाचे अंदूंचे कामगिरीक लागून राष्ट्रीय निवड समितीचे वांगडी फुडल्या वर्सा ताचेर लक्ष दवरून आसतले, हातूंत दुबाव ना. एका दोट्टी शेंकड्या सयत 471 धांवड्यो ही सुयश प्रभुदेसायाली कामगिरीय ताका ताचो आत्मविस्वास बळीश्ट करपाक उपेगी थारतली. कर्नाटका सारक्या बळीश्ट पंगडा आड फॉलोऑन उपरांतूय गोंयान मॅच सन्मानान ड्रॉ दवरली हातूंत गोंयान खूब कितें जोडलें आनी ह्या पंगडा आडचे बरे कामगिरीचेर नवो आत्मविस्वास मेळोवपाक आदार थारता. पुदुचेरी आड आमचो पंगड मात्सो घाळ रावलो आनी ताचें मोल तांकां फारीक करचें पडलें. गोंयच्या ह्या पंगडा कडल्यान फुडलीं दोन वर्सां आमकां आनीक बरे कामगिरीची नक्कीच आस्त बाळगुवपाक जाता.
गोंयांक आतां आंतरराष्ट्रीय क्रिकेट स्टेडियमाचे वेध लागप अपरिहार्य आसा. फाटल्या जायत्या वर्सांत क्रिकेट उदरगतीच्या नांवा खाला आमी खरेंच कितें केलें हे आतां भायर काडपांत कांय अर्थ ना, पूण इतले म्हणसर गोंयांत आंतरराष्ट्रीय क्रिकेट स्टेडियम जावपाक जाय आशिल्लें. उसरां कांय जायना जीसीएचे नवें तरणाटे नेतृत्व ते खातीर कामाक लागिल्ल्याचें पळोवन खोस दिसता. फुडल्या दोन वर्सांत सुसज्ज अशें क्रिकेट स्टेडियम धारगळे उबारपोच विडो तांणी उखल्ला, अशें दिसता. क्रिकेटीचे सर्वांगी उदरगती खातीर ती एक गरज. आंतरराष्ट्रीय मॅची आनी हेर म्हत्वाच्यो सर्ती हांगा जावपाक शकतल्यो. सध्या आमचे कडेन गुणवत्तेचो अजिबात उणाव ना, मात ते खातीर संद तयार करून दिवपाचें काम जीसीए आनी सरकाराक करचें पडटलें. जीसीएच्या कामांत खेळां खात्यान लेगीत सहकार्य केल्यार खूब गजाली हातासपाक जातल्यो. काम्पालाच्या एसएजीच्या मैदानाची सध्यची अवतिकाय पळयल्यार सरकाराक खेळा मळार खरीच रूच आसा काय कितें, हे विशी दुबाव येवचो अशी परिस्थिती आसा. ह्या मैदानार पासय मारल्यार हें मैदान कमी आनी प्रदर्शना खातीर मेकळी सुवात, अशें दिसता. मैदानार मदींच केल्लो क्रॉक्रिटाचो रस्तो पळयल्यार त्या फाटल्या कुशिल्ल्या मेंदवाची कींव करची अशें दिसता. ‘साग’ चें हें मैदान आतां मेरेन बरेंच विकसीत करपाक जातालें. मात प्रदर्शना आयोजीत करप आनी महसूल जोडप होच एकसुरो उद्देश थंय दिसता. अशीं कांय मैदाना जीसीए कडेन उदरगत करपाक दिवप हो ताचेर एक पर्याय. प्रदर्शना खातीर एकाद्री मेकळी सुवात राखून दवरल्यार खेळाचे उदरगतीक सरकाराक चड हातबार लावप शक्य जातलें.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
