भांगरभूंय | प्रतिनिधी
पणजी, बातमीदार ः दोनूय मुत्रपिंडां निकामी जाल्ल्या दुयेंतीचेर बोन मॅरो प्रत्यारोपणाची शस्त्रक्रिया करुन ताका कॅन्सरा पसून सुटका मेळोवन दिवपाचें काम मूळ गोंयची, पूण सध्या नागपूरांत (महाराष्ट्र) रावपी आनी थंय वैजकी सेवा दिवपी डॉ. रिया बाळ्ळीकार हिणें हें काम केलें.
मूळ मडगांवची रगत वैज आनी रगत कॅन्सर तज्ञ डॉ. बाळ्ळीकार सध्या नागपूरांत काम करता. ‘मल्टिपल मायलोमा’ हो पेशी संबंदीत कॅन्सर आशिल्लो 65 वर्सां पिरायेचो दुयेंती डॉ. बाळ्ळीकार हांचे कडेन उपचारा खातीर आयिल्लो. संबंदीत दुयेंतीक रगतांतल्या प्लाझ्मा पेशींची अनियंत्रीत वाड जाल्ल्यान हो कॅन्सर जाल्लो. ताका लागून ताचीं दोनूय मुत्रपिंडां निकामी जाल्लीं. ताचेर डायलिसीस सुरू आशिल्लें. उपरांत डॉ. बाळ्ळीकार हिणें ताचेर केमोथेरपी आनी इम्युनोथेरपी उपचार करून कॅन्सर नियंत्रणांत हाडलो. कॅन्सरा पसून सुटका मेळोवपा खातीर दुयेंतीक बोन मॅरो प्रत्यारोपण शस्त्रक्रिया करपाची गरज आशिल्ली. पूण तांतूत ताच्या जिवाकय धोको आशिल्लो. अशें परिस्थितींत लेगीत डॉ. बाळ्ळीकार हिणें वैजकी कुशळटायेचेर आदारून ही शस्त्रक्रिया येसस्वीपणान केली आनी दुयेंतीक नवें आयुश्य दिलें.
डॉ. रिया बाळ्ळीकार कोण?
० मुळ मडगांवच्या दामोदर उच्च माध्यमीकाचे निवृत्त प्राचार्य उदय बाळ्ळीकार हांची धूव.
० मडगांवच्या फातिमा कॉन्वेंट शाळेंत मुळावें शिक्षण, जाल्यार दामोदर उच्च माध्यमीकांत बारावे मेरेनचें शिक्षण.
० बांबोळेच्या गोंय वैजकी म्हाविद्यालयांत एमबीबीएसाचें शिक्षण.
० एमडी मुंबयंतल्या केईएम हॉस्पिटलांतल्यान, डीएम कोलकाता आनी डीएलबी सीएमसी वेल्लोर हांगाच्यान पुराय.
० सध्या नागपूरच्या किंग्सवे हॉस्पिटलांत काम करता. स्वताचेंय हॉस्पिटल आसा.
गोंयांतय वैजकी सेवा
कॅन्सर तज्ञ दोतोर गोंयांत हेर राज्यांतल्यान आपोवचे पडटात. गोंयांत सेवा दिवपाची तुमका इत्सा आसा काय अशें विचारतकच डॉ. रिया बाळ्ळीकार हिणें म्हणलें, गोंयांतच वैजकी सेवा दिवपाची म्हजी येवजण आशिल्ली. पूण म्हजो घोव नागपूरचो आशिल्ल्यान आमी कांय वर्सां नागपूरांत रावपाचें थारायलें. आमी धा वर्सांच्या लीजाचेर हॉस्पिटल घेतलां. हो काळ सोपलें उपरांत गोंयांत येवन वैजकी सेवा दिवपाचो म्हजो विचार आसा अशेंय तिणें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
