भांगरभूंय | प्रतिनिधी
पणजी : गोंयची सेगीत उदरगत करीत रावप हीच स. मनोहरभाई पर्रीकार हांकां खरी आर्गां थारतलीं अशें मत मुख्यमंत्री डॉ. प्रमोद सावंत हांणी उक्तायलें. तांणी शुक्रारा मनोहर पर्रीकार हांचे जयंती निमतान तांच्या मिरामारच्या समाधी स्थळाक भेट दिवन आर्गां ओंपलीं. ह्या वेळार पर्यावरण मंत्री आलेक्स सिक्वेरा, जलस्त्रोत मंत्री सुभाष शिरोडकार, उत्पल पर्रीकार आनी हेरअधिकारी हजर आशिल्ले.
गोंयची उदरगत होच पर्रीकरांचो ध्यास आशिल्लो. गोंयच्या मुळाव्या उदरगतींत तांचो म्हत्वाचो वांटो आसा. तांणी तांच्या काळांत दूरदृश्टी दवरून गोंयांत प्रकल्प सुरू केले. तांणी येवजिल्ले जायते प्रकल्प आयज आमी पुराय केल्यात. फुडेंय तांकां अपेक्षीत आशिल्ले नदरेन आमी गोंयां खातीर विवीध प्रकल्प उबारतले. ताञच्या पावलार पावल दवरून आमी गोंयचें प्रशासन तशेंच मुळाव्यो सुविधायो उबारतले, अशेंय मुख्यमंत्र्यांनी मुखार सांगलें.
पर्रीकरांनी हातांत घेतिल्लीं कामां पुराय जाल्यांत. तांच्या काळांत गोंय साधन सुविधा विकास महामंडळाचे (जीएसआयडीसी) तांचे कारिर्दींत सुरवात जाल्ली. जीएसआयडीसी खातीर स्वतंत्र इमारत आसची अशें तांकां दिसतालें. हे विशींय तेन्ना प्रस्ताव दवरिल्लो. मात कांय कारणांक लागून तो मुखार वचूंक ना. येवपी काळांत आमी हें कामूय पुराय करतले. तांणी तांच्या कार्यकाळांत गोंयां खातीर घेतिल्ले सगळे निर्णय आमी चालीक लायल्यात, अशें तांणी म्हणलें.
मनोहर पर्रीकर हे उत्तुंग व्यक्तिमत्व आशिल्लें. तांणी गोंयां खातीर तशेंच संरक्षण मंत्री म्हणून देशा खातीर केल्लें काम कायमचें लक्षांत उरतलें. तांच्या प्रामाणिकपणाक लागून ते सदांच जनतेच्या लक्षांत रावतले. तेन्नाच्या काळांत आमच्यांत वैचारीक मतभेद जरी आसले तरी ते म्हजे सामके लागींचे इश्ट आशिल्ले. तांच्या मरणान गोंयचें खूब लुकसाण जालें. मुख्यमंत्री डॉ. सावंत हे तांचें दायज मुखार व्हरतात, अशें आलेक्स सिक्वेरा हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
