भांगरभूंय | प्रतिनिधी
शॅक्स प्रस्नाचेर सभाघरांत नेटाची चर्चा
मायकलाच्या आरोपाक लागून खवदळ
पणजी : शॅक्स वेवसाय हो गोंयकारांचो वेवसाय आसा. शॅक्स वेवसायांत गोंयकारांचे हीत सांबाळपा खातीर सरकार नवें शॅक्स धोरण तयार करतलें. उत्तर गोंय तशेंच दक्षीण गोंयांत आदर्श शॅक्स आसतले. शॅक्स धोरणा सयत एकवटीत दर्यादेग वेवस्थापन आराखडो तयार जातलो अशें पर्यटन मंत्री रोहन खंवटे हांणी स्पश्ट केलां.
आमदार विरेश बोरकार हांचे लक्षवेधी सुचोवणेचेर सभाघरांत खूबसो वेळ चर्चा जाली. आमदार विजय सरदेसाय, मायकल लोबो, अलेक्स सिक्वेरा, एल्टन डिकॉस्टा हांणी चर्चेंत वांटो घेतलो. कोविडा वेळार पर्यटन वेवसाय ठप्प आशिल्लो. हाचो शॅक्स वेवसायाक फटको बसलो. हाका लागून सरकारान शॅक्स धनयांक शुल्कांत सवलत दिल्या. शुल्कांत सवलत दिवपाची शॅक्स धनयांची मागणी आशिल्ली ते प्रमाण तांकां सवलत दिली. शॅक्स वेवसाय हो पुराय तरेन गोंयकारांचो वेवसाय आसा. हो वेवसाय गोंयकारांचोच उरचो म्हूण नवें धोरण तयार जातलें. शॅक्स धनयांनी बेकायदाे गजालींक थारो दिवपाक जायना. उत्तर आनी दक्षीण गोंयांत आदर्श शॅक्सांची उबारणी जातली. आदर्श शॅक्स धोरण तयार करपाचो सरकाराचो प्रस्ताव आसलो. आदर्श शॅक्स धोरणाची अजून कार्यवाय जावंक ना.
कोयराच्या वेवस्थापना सयत दर्यादेग सुरक्षे खातीर एकवटीत दर्यादेग वेवस्थापन धोरण तयार जातलें. हें धोरण तयार जावपाची प्रक्रिया सुरू आसा अशें मंत्री रोहन खंवटे हांणी स्पश्ट केलें.
सूट मारून भायले लोक
मेळपाक येतात : मायकल लोबो
शॅक्स घालपा खातीर सूट मारून कांय लोक प्रतिश्ठीत लोकांक गोंयांत मेळपाक येतात असो आरोप मायकल लोबो हांणी केलो. तांच्या ह्या आरोपाक लागून सभाघरांत खवदळ निर्माण जालो. मेळपाक येतात त्या लोकांचीं नांवां सांगचीं अशी मागणी आमदारांनी केली. दर्यादेगांचेर शॅक्स वेवसाय 1970 च्या दसका सावन सुरू आसा. शॅक्स धोरण तशेंच दर्यादेग वेवस्थापनाची चर्चा 2012 सावन सुरू आसा. बस, टॅक्सी वेवसाय हांचे भशेन शॅक्स वेवसाय हो गोंयकारांचो वेवसाय आसा. तो गोंयकारांच्या हातांत उरपाक जाय अशें मायकल लोबोन सांगलें.
उदकाचे जोडणे सयत सीवरेज लायन सरकारान उपलब्ध करून दिवपाक जाय. पर्यटना खातीर शॅक्स वेवसाय उरप गरजेचो आसा. ह्या वेवसायाक लागून रोजगार लेगीत निर्माण जाता.
शॅक्सकारांच्या मागण्यांचेर सरकारान सहानुभुतीन विचार करपाक जाय. तांकां मुळाव्यो सुविधा उपलब्ध करून दिवपाक जाय अशी मागणी आमदार वेंझी व्हिएगश हांणी केली.
उजो आसले बगर धुंवर येना. मायकल लोबो हांणी जे आरोप केल्यात तातूंत तथ्य आसपाक जाय अशें अलेक्स सिक्वेरा हांणी सांगलें.
शॅक्सा खातीर भायले लोक मेळपाक येतात असो आरोप मायकल लोबो हांणी केलाे. ह्या आरोपाची चवकशी जावपाक जाय अशी मागणी आमदार विजय सरदेसाय हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
