भांगरभूंय | प्रतिनिधी
मडगांव, प्रतिनिधी: फोंड्या आयज सकाळीं जाल्ले फारपेटीचे घडणुकेक लागून गोंयची कायदो आनी सुवेवस्था धोक्यात आशिल्ल्याचें मुखार आयलां. ह्या वाठारांतले सीसीटीव्ही कॅमेरेय सुरू नाशिल्ल्याचें कळ्ळां. सरकाराच्या इव्हेंटांचेर जावपी खर्चाक लागून गोंयकारांचे सुरक्षिततायेचे नदरेन सरकार फकांडां केल्ल्याचें दिसता असो आरोप विरोधी पक्ष फुडारी युरी आलेमाव हांणी केलो.
बेतोड्या जंक्शनार अनवळख्यान केल्ल्या फारपेटीचेर प्रतिक्रिया दितना आलेमांव हांणी गोंयचो गुन्यांवकारी स्थळां मदीं आस्पाव केल्ले खातीर सरकाराचेर टिका केली. गुन्यांवकारी, घुवळे वखदां, शिंदळकी वेवसाय, भिकारी, जमीनीन कब्जो करपी माफिया हांकां सरकार उर्बा दिता, अशें दिसता. गोंयकार सदांच गंभीर गुन्यांवांची बातमी आयकूनच जागे जातात, अशें तांणी फुडें म्हणलें.
राजकी हस्तक्षेपाक लागून कायद्याची अंमलबजावणी करपी यंत्रणां मोडिल्ल्यान गुन्यांवगारांच्या मनांत भंय उरूंक ना. भाजपाच्या आशीर्वादान माफिया कार्यरत आशिल्ल्याचो दावो युरी हांणी केला.
आदीं मिरामार एका बाळकाक सोडून दिल्लें तेन्ना थंयचे कॅमेरे मोडिल्ल्यान दुबावीत मेळूंक ना. परत सिसीटीव्ही कॅमेरे मोडिल्ल्यान मुखार आयलां. तरी भाजपा सरकारान फाटले घडणुके वयल्यान सुदारणा करूंक ना अशें तांणी म्हणलें.
हे घडणुकेचो खोलायेन आनी निपक्षपातीपणान तपासणी करपाचो आनी घडणुके सुवातेर कार्यरत नाशिल्ल्या सीसीटीव्ही कॅमेर्याविशीं सविस्तर अहवाल जारी करचो, अशी मागणी करतना नागरिकांक सुरक्षितताय दिवपाक अपेशी थारिल्ल्या सरकाराक राज्य करपाचो अधिकार ना अशेंय आलेमांव हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
