गोंयकारांक नेमकी कोणाची गॅरेंटी ?

भांगरभूंय | प्रतिनिधी

सत्ताधारी भाजपान उत्तर गोंयची उमेदवारी श्रीपाद नायक हांकां जाहीर करून आपलो ‘टोटल फोकस’दक्षीण गोंयचेर दवरला. उत्तरेंत पांच फावटी वेंचून आयिल्ले आनी केंद्रांत मंत्रीपदाचेर अशिल्ले श्रीपाद भाऊ हो ‘शुअर सीट’ अशें भाजपाक दिसता. हें दिसप चुकीचें ना. उत्तरेंत पांच गोलांट्यो खावनूय बी काँग्रेस कांयच धडो शिकूंक ना, हें आतांचे तांचे परिस्थिती वयल्यान दिसता. रिव्होल्यूशरी गोवन्स पार्टीन उत्तरेंत मनोज परब आनी दक्षिणेंत रुबर्ट परेरा हांची उमेदवारी जाहीर करून आपलें काम पयलींच सुरू केलां. सगल्या विरोधकांक एकठांय हाडून आपलो धग पेटोवपाचो काँग्रेशीचो यत्न येसस्वी जाला अशें म्हणपाक मेळचें ना.
आरजीपी सोडून गोवा फॉरवर्ड आनी आप ह्या पक्षांनी ‘इंडी’ आघाडेक तेंको दिला. आपा कडेन जाल्ले आघाडीक लागून काँग्रेसी भितर मात्सो जीव आयला खरो, पूण दक्षिणेंत सध्याचे खासदार फ्रान्सिस सार्दीन हांकां उमेदवारी दित जाल्यार आमी ना, अशें म्हूण विजय सरदेसाय हांणी काँग्रेसीक आनीक पेचांत हाडल्यात. उत्तरेच्या जागे वयल्यान काँग्रेसीचो ‘कॉन्फिडन्स लेवल’ सामको देंवला. थोडी तरी पक्षाची अब्रु उरपाक जाय हें तांकां पळोवचें पडटलें. गोंयांत सगल्यांत चड काळ सत्तेर अशिल्ल्या काँग्रेसीची परिस्थिती इतली बेकार जाल्या की तांचे कडेन आतां उरल्यात फकत बोटार मेजूंक मेळपी तीन आमदार . ते मायनोरीटीची अशिल्ल्यान हिंदुबहूल उत्तर गोंयांत कितें करचें हाचो पेच तांचे मुखार आसा. फाटल्या कांय वर्सां सावन तांणी उत्तर गोंय मतदारसंघ वाऱ्यारूच सोडला. लोकसभेच्या वेंचणुके वेळार उमेदवारी खातीर अर्ज करपी फुडारी पक्षा खातीर नेमके कितें करतात हें कोणाकूच खबर ना. आरजीपी पक्ष मतां फोडटलो असो भंय दाखोवन काँग्रेस भाजपाक टक्कर दिवपाचो यत्न करता खरो, पूण ‘ग्रावंड रिएलीटी’ पळयत जाल्यार काँग्रेसीन खरेंच उत्तर गोंयचे परिस्थितीचेर चिंतन केलां काय कितें, हे विचारचें पडटलें. काँग्रेसीच्या तिकिटाचेर वेंचून आयिल्ले आमदार, खासदार पक्षा वांगडा खरेंच उरतले काय कितें, असो प्रस्न गोंयकारांक पडप चुकीचें न्हय. जे लोक देवाक फटोवंक शकतात ते कोणाकुय शेंडी लावंक शकतात अशें लोकांक दिसता आनी ते खातीर लोकां भितर विस्वास तयार करपा सयत परतून एक फावट लोकांक काँग्रेसी कडेन वळोवपाचें व्हड आव्हान काँग्रेसी मुखार आसा.
आतां दक्षिण गोंयचे बाबतींत पळोवंक गेल्यार काँग्रेसीन दोन नांवांची वळेरी केंद्रांत धाडल्या. तांतूत सध्याचे खासदार फ्रान्सिस सार्दीन आनी कॅप्टन विरियातो फर्नांडिस. आतां मेरेन काँग्रेसीक साश्टीन वाटायल्या. साश्टीन काँग्रेसीची साथ सोडली आनी काँग्रेस निसरून खाला आयली. कॅप्टन विरियातो हांणी मायनोरीटी लोकां भितर आपली बरी इमेज तयार केल्या. साश्टी आनी ते मुरगांवचे आशिल्ल्यान ह्या तालुक्यांतल्यान तांकां तेंको मेळपाक शकता, पूण फ्रान्सिस सार्दीन हांचे विशी हिंदू लोकां भितर जी Acceptability आसा ती कॅप्टनाक ना, अशें काय जाणांक दिसता. ह्या सगल्या गजालींचो नियाळ घेत जाल्यार काँग्रेसीक फ्रान्सिस सार्दीन हेच ‘बळिश्ट’ उमेदवार दिसतात. पूण हांतूत आतां जालां अशें की विजय सरदेसाय हांणी मात सार्दिनाक न्हयकार दिला. बरें विजय हांणी कोण उमेदवार आसचो हाचेर कांयच भाश्य केल्लें ना. फाल्यां सार्दिनाक तिकेट दिल्यार विजय आपल्याक जाय ताका तेंको दिवपाक मेकळो. मागीर काँग्रेसीक ताचेर उलोवपाकूय मेळचें ना. सगलेच वटेन काँग्रेस अडचणीत आयल्या. काँग्रेसीचो प्रदेशाध्यक्ष अमित पाटकार हो बाबडो आपले परीन खूब यत्न करता, पूण काँग्रेसीचें पद घेतल्या उपरांत कितें कितें सोसचें पडटा हें तांकां आतां कळून चुकलां आसतलें. हेर फुडाऱ्यांनी तें पळयलां आनी सोसलां हे खातीर ते हे संस्कृतीक सरावल्यात आनी तांकां हातूंत कांयच दिसना.
सत्ताधारी भाजपान प्रचाराचो नेट लायला तें पळयत जाल्यार काँग्रेस फकत आपल्या ऑफिसाच्या कुडींतूच वावरता अशें दिसता. खरें म्हटल्यार मुख्यमंत्री प्रमोद सावंत हे पांयांक चाकां लायिल्ले भशेन जशे गोंयभर भोंवडेर वतात तशेच विरोधी पक्ष फुडारी युरी आलेमाव हांणींय इतल्या मेरेन गोंय फिरूंक जाय अशिल्लें. पूण ते खंयच दिसनात. एक तरणाटो आनी बरो उलोवपी युरी आलेमाव हो काँग्रेसीक तारतलो अशें सुरवातेक दिसतालें. तो विधानसभेंतूय बरो फिचर जाल्लो पूण युरी आलेमाव हो ‘इनडोअर प्लेअर’ कसो दिसूंक लागला. राजकारणांत ‘आऊटडोर प्लेअर’ आसपाची गरज. युरी हे विरोधी पक्ष फुडारी म्हूण लोकां भितर कित्याक वचनात हेंच कळना. मागीर कोण तरी म्हण्टा की हे सगले भाजपाक मेळून आसात आनी भाजपान तांकां मुद्दाम काँग्रेसींतूच रावपाक सांगलां, कित्याक तर काँग्रेसीचे समर्थक हेर पक्षां कडेन वचूंक जायना आनी ताचो राजकी फायदो तांकां मेळपाक जाय.
विरोधी पक्ष फुडाऱ्याक कॅबीनेट दर्जो आसता. तेका सरकारची गाडी मेळटा. स्टाफ मेळटा. हें सगलें कित्याक तर तांणी राज्यभरांतल्या लोकांक विरोधी पक्ष फुडारी म्हूण न्याय दिवपाचो आसता. युरी आलेमाव हो न्याय दिवपाक खरोच येसस्वी जाला काय कितें हाची जाप गोंयकारांनीच दिवची पडटली. विरोधी पक्ष फुडारी जावन आतां कितलोच तेंप जालो, पूण पर्वरे तांणी लोकांक मेळपाक आपलें वेळाचें पत्रक आजनूय जारी करूंक ना, अशीय कागाळ लोक करतात. असल्या बेभरवंशी फु़डाऱ्यांचेर विस्वास दवरून सर्वसामान्य जनता भाजपा कडेन आनी सरकारा कडेन कित्याक कॉत्रपण आनी वायटपण घेतली. हें कॉत्रपण आनी वायटपण घेवपाक तशी तांक आनी विस्वास विरोधी पक्षान लोकां भितर तयार करचो आसता तो सध्याच्या काँग्रेसी भीतर मात्तूय दिसून येना.
‘एक्सीडेंटल सीएम’ म्हूण उल्लेख जातालो ते प्रमोद सावंत हांणी ‘इलेक्टेड सीएम’ म्हूण आपलो मान मेळयलोच, पूण म्हण्टा- म्हण्टा गोंय भाजपाचे सगल्यांत चड कार्यकाळ मुख्यमंत्रीपदाचेर रावपी ते पयले थारले. आयचे घडयेक राजकी इतिहासांत 40 वांगड्यांचे विधानसभेंतल्या 33 वांगड्यांचें फाटबळ आसपी ते पयले मुख्यमंत्री. अचकीत मुख्यमंत्रीपदाचेर आयिल्ले दोतोर प्रमोद सावंत आयचे घडयेक सगल्यान येसस्वी सीएम म्हूण थारल्यात.
प्रमोद सावंत हांच्या फुडारपणाचेर जाम खूश जावन दोन फावटी विरोधी पक्ष फुडारपणाखाला काँग्रेसीचे दोन
तृतीयांश आमदार भाजपान येवपाचो नवो विक्रम जालो. प्रमोद सावंत हांणी कांय थोड्याच काळांत प्रशासन आनी राजकी मळार आपल्या नेतृत्वाची वळख दाखयली. केंद्रांत प्रधानमंत्री नरेंद्र मोदी आनी गृहमंत्री अमित शहा हांचो विस्वास तांणी बरे पयकी संपादन केला हेंवूंय आमकां पळोवंक मेळटा. ते मुख्यमंत्री जाल्या उपरांत विधानसभा पोटवेंचणुको, पंचायती, जिल्लो पंचायती, नगरपालिका आनी मागीर नव्यान जाल्ल्या २०२२ च्या विधानसभा वेंचणुकेंत जैत मेळोवन प्रमोद सावंत हांणी आपली खरी तांक सिद्ध करून दाखयली. कोणें कितेंय म्हणू पूण तांच्या येसाचे स्रय हें तांकां दिवचेंच पडटलें.
प्रमोद सावंत हांकां आतां मुख्यमंत्री जावन पांच वर्सां पुराय जातलीं. तांणी केन्नाच आपलो संयम सोडिल्लो आमकां दिश्टी पडूंक ना. हासरें मुखामळ, कसलेंच वजें घेवप ना, रागार, फुगार जावन आपलो तोल ढासळूंक दिवप ना. पयली तांचेर टीका करपी आयज तांचे वांगडाच भाजपान आयल्यात. हेर जे टिका करतात तांचेर ते केन्नाच रागार जाल्ले पळोवंक मेळनात. सतत लोकांच्या संपर्कांत रावप, लोकां कडेन उलोवप, प्रस्न समजून घेवप आनी शक्य जाता तसो ताचेर उपाय काडप. साखळे रवींद्र भवनांत चुकनासतना ते लोकांची भेट घेत आसतात. राजकी फुडाऱ्यान खंय पयलीं आयकपाची तांक दवरूंक जाय. ती तांक सावंत हांची खरी शक्त जाल्या. ते लोकांचे आयकतात आनी लोकांक तेंच पुरो आसता. आपलें म्हणणें, दुखणें मुख्यमंत्र्यान आयकलें हातूंतच तांकां धादोसकाय मेळटा. खंयचोच मुख्यमंत्री शंभर टक्के लोकांची कामां करपाक शकना, जांचीं कामां जातात ते तांची तोखणाय करतात आनी जांचीं कामा जायनात ते तांचेर टिका करतात हो निसर्ग नेम. आयचे घडयेक भाजप कोणाकूय सीएम करूं शकता इतली राजकी तांक त्या पक्षा भितर आसा पूण तांणी मुख्यमंत्री सावंत हांचेरूच कसो कितें विस्वास दवरला हाची जाप म्हटल्यार प्रमोद सावंत हांणी सिद्ध केल्ली आपली तांक आनी मेळयल्लें येस.
आयचे घडयेक लोकसभा वेंचणुकेंत दोनूय जागे भाजपाक मेळोवन दिवपाक प्रमोद सावंत हांणी शिवधनुश्य हातांत घेतला. 1999 आनी 2014 ह्या दोन फावट भाजपाचे दोनूय खासदार वेंचून आयिल्ले. 1999 त जाल्या वेंचणुके वेळार राज्यांत लुईझिन फालेर हांच्या मुख्यमंत्रीपदाखाला काँग्रेसचें सरकार आसलें आनी 2014 ह्या वर्सा आदले मुख्यमंत्री आनी आदलें संरक्षणमंत्री सर्गेस्त मनोहर पर्रीकार हांच्या फुडारपणा खाला सरकार आसलें. आयज राज्यांत आनी केंद्रातूय बी भाजपाचें सरकार अशिल्ल्यान प्रमोद सावंत हांकां दोनूय जागे जिखपाक जाय. तशें जायत जाल्यार राश्ट्रीय मळाचेर तांच्या येसांक आनीक नेट मेळटलो.
शेजारच्या महाराश्ट्र, कर्नाटक, केरळ आनी तेलंगण हांगासर पक्षाचे वटेन मुख्यमंत्री प्रमोद सावंत थंय भेट दितात. थंयच्या भाजपा फुडाऱ्यां कडेन बसका घेतात आनी भौशिक सभांकूय संबोदीत करतात. हाचे वयल्यान तांचो ‘कॉन्फिडन्स लेवल’ तयार जाल्लो आसा. गोंयच्या मळार तर तो तेंगशेर पावला. गोंयच्याच ज्येश्ट फुडाऱ्यांक तांणी फाटी घालून आतां आपली ईमेज बरे तरेन तयार केल्या. आदले मुख्यमंत्री म्हूण रवी नायक, दिगंबर कामत हे तांच्या वांगडा काम करतात. राज्यांतल्या ज्येश्ट फुडाऱ्यां कडल्यान तांची तोखणाय आयकत जाल्यार तांणी फावो केल्ली लोकप्रियता दिसून येता.
तांचें भाशण आनी तांची तडफ पळयत जाल्यार हेर राजकारणी तोंडांत बोटां घालपाक लागल्यात. भाशणांत जे तरेन प्रधानमंत्री नरेंद्र मोदी सरकारान केल्लीं कामां आनी राज्यांतली भाजपाची कामां हाची वळेरी सांगताना ते मात्तूय थकनात. तांच्या भाशणांतल्यान एक गजाल दिसून येता ती म्हटल्यार तांच्या शिरंतरांनी आतां भाजपा आनी मोदी भरल्यात. मात्तूय थकनासतना आनी मुखामळा वयलो हांसो पयस करनासतना ते जे तरेन काम करतात तें पळयत जाल्यार मुख्यमंत्री जावपाची सपनां पळोवपी फुडारी हें आपल्याक जमत काय, असो विचार करपाक लागतल्यात आसतले, हें मात खरें.
मुख्यमंत्री जर सरकाराचीं कामां सांगतात जाल्यार विरोधकांनी हीं कामां कशीं फसल्यांत, चुकल्यांत तें सिद्ध करपाक जाय, सरकारी येवजण्यो लोकां मेरेन पावल्यो असो दावो सरकार करता जाल्यार त्यो कशो पावूंक ना हें विरोधकांनी दाखोवचें आसता. बेकार, तरणाटे, बायलां, जाण्टे हाचेर सरकारान कसो अन्याय केला हे पटोवन दिवचें आसता. हें करपांत विरोधी पक्ष मात्तूय येसस्वी जावंक ना. आरजीपी ते खातीर यत्न करतात खरे, पूण तांची ताकद मर्यादीत आसा आनी तांचे कडेन मुख्य प्रवाहांतली मीडीया लेगीत सिरीयसली पळयना. हे खातीर तांचेर फोकस पडना. भाजप नव्यान आयिल्ली तेन्नाय मिडीया तांकां सिरीयसली घे नासली, पूण मागीर भाजपान आपली ताकद वाडोवन मीडीयाचें लक्ष आपले कडेन वळयलें. आरजीपीची तीच प्रकिया सुरू आसा. इतकी वर्सां सदांच मीडीयाच्या फोकसांत आसपी काँग्रेसूय बी मीडीयाचेर टिका करता. मीडीया विरोधकांक स्पेस दिना आनी फकत सरकारचे गुणगान गाता. काँग्रेस लोकां खातीर अशें फोकस दिवपाक करता तरी कितें, असो प्रस्न करत जाल्यार ताची जाप ना. ते सत्तेंत आसले तेन्ना विरोधांत आसपी भाजपूय बी अशीच मीडीयाचेर टिका करताले. मुळांत लोक भाजपाचेर बेजार जाल्यात आनी ते आपसूक आपल्याक मतदान करतले अशें काँग्रेसीक दिसता.
राजकी मळार लोकां भितर काम करून आनी लोकांचो विस्वास संपादन करून सत्तेर येवपाची संद काँग्रेसीक खूप कमी मेळल्या. तांकां सत्ता ही वारसा हक्कान फावो जाल्या. सत्ते खातीर कितें कितें सोसचे पडटा आनी कसो वावर करचो पडटा हें भाजपाकडल्यान शिकचें. आयज आरजीपी हो प्रादेशिक पक्ष तीच देख घेवंन वावुरता. लोक तेंका वोट कटर्स आनी वोटकापू म्हणटात पूण हाचो तांचेर कांयच फरक पडना कित्याक तर तांचे नदरे मुखार तांची मोख स्पश्ट आसा. खंयचोय एक गिरेस्त मनीस काय कारणांक लागून जेन्ना गरीब जाता तो जर आपली परिस्थिती न वळखता गिरेस्तकायेच्या तोऱ्यांतूच वावरूंक लागलो जाल्यार ताची समाजांत कितें गत जाता ती पळयत जाल्यार तशी काँग्रेस पक्षाची जाल्या कशी दिसता. ह्या पक्षा कडेन परतून वयर सरपाची तांक आसा पूण तांच्या फुडाऱ्या मदीं ती मात्तूय दिसून येना.
हो संवसार विचित्र आसा. हांगासर भिकाऱ्याक हात फुडें करूनूच भिक मागची पडटा. आपूण उपाशी आसा अशें म्हूण लोक येवंन आपसुकूच जेवण दितले अशें म्हूण तो रावलो जाल्यार उपाशी मरतलो. राजकारणाचें तशेंच. कोणूय कितलोय हुशार आसलो म्हूण जो मेरेन तुमी लोकां मेरेन वचून ह्या हुशारीची वळख करून दिवचे नात आनी लोकांचो विस्वास मेळोवचे नात तो मेरेन लोक तुमचे कडेन येवचे नात. भाजपाच्या नाराजीचेर आनी चुकीच्या धोरणाच्या रागाचेर आपलो सत्तेचो तवो तापोवन ताचेर पोळी भाजपाचे सपन काँग्रेसीन सोडून दिवचें. लोकां लागीं वच्चेंच पडटलें आनी सरकारची उणीदुणी दाखोवन तुमी तांचें कशें भलें करपाक शकतात, हें पटोवन दिवचेंच पडटलें. जो मेरेन ही गॅरेंटी काँग्रेस लोकांक दिवपाक शकना तो मेरेन प्रधानमंत्री नरेंद्र मोदी हांचेच गॅरेंटीची चर्चा जातली इतलें मात खरें…

किशोर नायक गांवकार
7774039242