भांगरभूंय | प्रतिनिधी
अापलीं भुरगीं आंगान घटमूट, काळजान शुद्ध आनी उदार बुद्धीन व्हड आनी निर्मळ जावचीं अशें आवय बापायन पळोवंक जाय. ज्या काळांत आमी रावतात त्या काळाची जाणवीकाय भुरग्यांक करून दिवपाक जाय. जेवतना, खेळटना भुरग्यांक इतिहासाचें गिन्यान दिवपाक जाय. विसाव्या शेंकड्यांतलीं भुरगीं ‘माजर आडवें आयलें जाल्यार काम फसलें’ अशा कल्पनांनी भरून वच्ची ना अशें करूंक जाय. म्हजे एक मित्र आसात. तांणी म्हणलें, “म्हज्या भुरग्या बाळांच्या मुखार अशें कोणय उलयलो जाल्यार म्हाका तिडक येता. आमच्या मनार ल्हानपणांत हें संस्कार जाले, पूण आमच्या भुरग्यांच्या मनार हे असले नाका आशिल्ले संस्कार जापाक नाकात.” भुरग्यांच्या मना खातीर केदी व्हडली ही जतनाय!
आपल्याक कितल्या भुरग्यांची जतनाय घेवपाक जातली, कितल्या भुरग्यांची उदरगत करपाक येतली हें आवय बापायन पळोवपाक जाय. कित्याक तर फुडारांत वानप्रस्थाश्रम आनी सन्यासाश्रम आसातच. मरसर काय पाळणीं हालयत रावपाची ना आनी वानप्रस्थाश्रमाक वचपाच्या वेळार भुरगीं संवसार आपल्या आंगार घेवपाक जाय अशी जावपाक जाय.
समजा साठाव्या वर्सा वानप्रस्थाश्रम घेवपाचो जाल्यार ताका कितें अर्थ? साठाव्या वर्सा म्हजे सगळ्यांत धाकटें भुरगें पंचवीस वर्साचें आसत जाल्यार ताचें शिक्षण पुराय जाल्लें आसतलें, ताची सारकी वाड जाल्ली आसतली. आवय बापायच्या आदाराची ताका गरज ना अशें जावपाक जाय. म्हणल्यार चाळीसाव्या वर्साक साकून घोव बायलेन भोगपासून निवृत्त जावपाक जाय. चाळीसाव्या वर्सा मेरेन हे रितीन प्रजोत्पादन करपाक जाय. कित्याक तर चाळीसाव्या वर्सा मेरेन आठ धा भुरगीं जावपा कितें हरकत आसा. पूण फकत भुरगीं जल्माक आयलीं म्हणून जायना तर त्या भुरग्यांची आपल्याक जाय तशी वेवस्था करपाक येवपाक जाय. तांकां वाडोवप, तांची जतनाय घेवप आनी शिकप करपाक जाय. आपणाक नियंत्रण घालपाक येना जाल्यार संतती नियमनाचो आदार घेवपाक जाय. पूण मनशाक नियंत्रण चड सोबून दिसता.
गृहस्थाश्रमाक नियंत्रण, त्याग, वासनाविकार हांकां बांदून दवरप, प्रेम, सहकार्य आनी हेर गुणांचें शिक्षण मेळटा. थिल्लरपणा कमी जाता आनी मनीस गंभीर जाता. जिणेचे वेगवेगळे अणभव मेळटा आनी जीण सुंदर जाता. मर्यादीत घराब्याची आपणें सेवा केली. त्या मर्जादीत घराब्यांत जे सेवेचे गूण आसात ते आपूण शिकलो आनी आता ते समाजाक दिवपाक जाय. आपल्या घराब्यांतल्यान भायर सरून समाज होय घराबो अशें मानपाचें, चड विरक्त जावपाचें, व्हडल्या नदरेचो जावपाचें, चड वाडपाचें आनी आत्म्याचें राज्य वाडोवपाचें.
(फुडें चालू)
मूळ लेखकः साने गुरुजी,
अणकारः पांडुरंग नाडकर्णी
पांडुरंग नाडकर्णी
9326139252
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
