भांगरभूंय | प्रतिनिधी
काणकोण: मोखर्ड हांगासरल्या लोकविस्वास प्रतिश्ठानाच्या दिव्यांग भुरग्यांचे शाळेंतलो विद्यार्थी प्रताप गांवकार हाणें बिगर सरकारी संस्थेच्या पालवान गुळ्यां सुरू केल्ल्या फुलांच्या गाड्याचें उक्तावण जालें.
लोकविस्वास शाळेंत शिकपी गुळेंचो प्रताप गांवकार हाका ‘कारितास गोवा’ हे संस्थे वतीन फाटले कांय म्हयने खासा प्रशिक्षण सुरू आशिल्लें. ताची उदरगत समाधानकारक आशिल्ल्यान ताका स्वताचो स्वतंत्र वेवसाय म्हूण फुलांचो गाडो सुरू करपा खातीर सदर संस्थेन अर्थीक मजत करतनाच सुरवातेक म्हयनोभर तरी ताचे मजतीक खासा शिक्षिकेची नेमणूक केल्या.
गुळें बाजारांत हो गाडो सुरू केल्लो आसलो तरी सप्तकभरांतले दोन दीस करमलघांट गणपती देवूळ आनी भुमीपुरूष देवळा मुखार फुलां विकपाचो प्रतापाचो हावेस आसा. खासा शाळेंतल्या विद्यार्थ्यान काणकोण म्हालांत पयलेच फावटी स्वताचो वेवसाय सुरू केल्ले खातीर सगल्यांनी ताची तोखणाय केली आनी शुभेत्सा दिल्यो.
लोकविस्वास प्रतिश्ठानाचे मोखर्ड शाळेंतले सल्लागार समितीचे वांगडी शिरीश पै आनी विनय तुबकी हांचे हाजिरेंत थळाव्यो पंच वांगडी अक्षदा वेळीप हांचे हस्तुकीं फीत कापून अधिकृत रितीन ह्या गाड्याचें उक्तावण केलें. पंच वांगडी गणेश गांवकार, शिक्षिका अदिती फळदेसाय, अंजली गांवकार, अर्जून गांवकार तशेंच संस्थेच्यो मालिनी पागी ह्या वेळार हाजीर आशिल्ल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
