भांगरभूंय | प्रतिनिधी
शुभमन गिल इंडियन प्रिमियर लिगेंत (आयपीएल) गुजरात टायटन्साचें फुडारपण करतलो. फ्रॅंचायजीन काल हाची घोशणा केली. अश्टतासांचो खेळगडो हार्दिक पांड्यान पंगड सोडिल्ल्यान हो बदल करपचो पडलो.
हार्दिक पांड्या फुडल्या हंगामांत मुंबय इंडियन्सा वतीन खेळटलो. हे विशीं मुंबय इंडियन्सान लेगीत अधिकृत रितीन घोशणा केली. शुभमन गिलान अंदूंचे आयपीएलांत सगल्यांत चड धांवड्यो केल्यात. ताणें सात मॅचींनी खेळटना 59.33चे सरासरीन 890 धांवड्यो केल्ल्यो. 24 वर्सां पिरायेच्या गिलान 2018त आयपीएलांत पदार्पण केल्लें. अजून मेरेन 91 मॅचींनी खेळटना 2790 धांवड्यो केल्यात.
गुजरात टायटन्सान 2022त पयले खेपे आयपीएलांत वांटो घेतिल्लो. हार्दिक पांड्याच्या फुडारपणाखाला गुजरात टायटन्सान आपल्या पयल्याच हंगामांत वस्तादपण जोडिल्लें. अंदूंच्या हंगामांत लेगीत तो फायनलींत पाविल्लो.
हार्दिकान आयपीएलाच्या दोन हंगामांनी आपूण मुखेलपद येसस्वी रितीन सांबाळपाक शकता हें सिद्ध केलां. तशेंच तो भारताच्या टी-20 पंगडाचो लेगीत मुखेली आसा. ताका लागून घडये मुंबय इंडियन्साचें लेगीत तो फुडारपण करपाक शकता. पूण, रोहित शर्मा कडल्यान मुखेलपद काडून घेवप लेगीत तितलें सोंपें ना. ताच्या फुडारपणाखाला मुंबय इंडियन्सान पांच खेपे वस्तादपण जोडलां.
हार्दिक पांड्यान आपले आयपीएल कारकिर्दीची सुरवात 2015त मुंबय इंडियन्सा वरवीं केल्ली. ताचे हाजेरेंत मुंबय इंडियन्सान चार किताब जिखिल्ले. हार्दिक 2021 मेरेन मुंबय इंडियन्सांत आशिल्लो. ते उपरांत तो जखमी जालो आनी ज्या वेळार पुनरागमन केलें त्या वेळार तो बॉलींग करिनाशिल्लो. मुंबय इंडियन्सान ताका 2022त मेकळो केल्लो. तेन्ना सावन तो दोन हंगामांनी ताणें गुजरात टायटन्साचें फुडारपण केल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
