भांगरभूंय | प्रतिनिधी
दिल्ली कॅपिटल्सान जबरदस्त पुनरागमन करतना हांगाच्या नरेंद्र मोदी स्टेडियमाचेर जाल्ले मॅचींत येजमान गुजरात टायटन्साक 6 विकेटींनी हारयलो. ह्या जैतान दिल्लीन गुणतकट्यांत 9वे वयल्यान सवे सुवातेर उडी घेतली.
अंदूंचे इंडीयन प्रिमियर लिगेच्या (आयपीएल) हंगामांतली उण्या स्कोराची नोंद जाली.
गुजरात टायटन्साचो डाव 89चेर सोंपयल्या उपरांत दिल्ली कॅपिटल्सान मोख 8.5 ओव्हरींनी 4 विकेटी वगडावन 92 धांवड्यो करून मेळयली. जॅक फ्रेजर-मॅकगर्कान जबरदस्त सको मारून दिल्ली कॅपिटल्साच्या डावाची सुरवात केली. 10 बॉलांनी दोन चवके आनी दोन सक्यांचे मजतीन 20 धांवड्यो करपी जॅकाक दुसरे ओव्हरींत स्पेन्सर जॉन्सनान ताका तंबूंत धाडलो. पृथ्वी शॉ (7) संदीप वॉरियरच्या बॉलाचेर बाद जालो. पूण, शाई होप आनी अभिषेक पोरेल हांणी 4,4,4,6,6,1,6 अशे तरेन धांवड्यांचो पावस घालून दिल्ली कॅपिटल्साक परतून फ्रण्टसिटाचेर हाडलो. पूण, संदीपान 7 बॉलांनी 15 धांवड्यो करपी अभिषेकाक बाद केलो.
शाई होप (19) राशीद खानाच्या बॉलाचेर बाद जालो. पूण, दिल्ली कॅपिटल्सान पावर प्लेंत 4 विकेटी व्हगडावन 67 केल्यो. मुखेली ऋषभ पंतान आक्रमक बॅटींग करून मॅच णववे ओव्हरींत सोंपयली.
ते पयलीं शुभमन गिल (8), वृद्धिमान साहा (2), साई सुदर्शन (12) आनी डॅव्हिड मिलर (2) हे पावर प्लेंत तंबूंत परतून गेले. सुमित कुमारान फिल्डिंगेंत फिशालपण दाखोवन साईक धांवबाद केलो. ऋषभ पंतान लेगीत डॅव्हिड मिलराची उत्कृश्ट कॅच धरली. अभिनव मनोहर (8) आनी इम्पॅक्ट प्लेयर म्हणून आयिल्लो शाहरुख खान (0) हांकां त्रिस्तान स्तब्साचे पयलेच ओव्हरींत ऋषभ पंतान उत्कृश्ट रितीन स्टम्प बाद केले.
राहुल तेवतिया (10) आनी मोहीत शर्मा (4) अपेशी थारले. राशीद खानान 23 बॉलांनी 31 धांवड्यो केल्यो. मुकेश कुमारान 18वे ओव्हरींत दोन विकेटी घेवन गुजराताचो डाव 89 धांवड्यांचेर सोंपयलो.
मुकेश कुमारान 3, जाल्यार इशांत शर्मा आनी त्रिस्तान स्तब्स हाणें दरेकी 2 विकेटी घेतल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
