भांगरभूंय | प्रतिनिधी
खबरां संस्था
लखनौः साई सुदर्शन आनी कॅप्टन शुभमन गील हांचो आडवाद सोडल्यार भरवश्याच्या बॅट्समनांनी दगो दिल्ल्यान आयपीएलाचे 21 वे मॅचींत गुजरात टायटन्सांक लखनौ सुपर जायंन्टां कडल्यान 33 धांवड्यांनी हार खावची पडली. शुभमन गील, केन विलियमसन साई सुदर्शन हे बिन्नीचे बॅट्समन 58 धांवड्या भितर आवट जाल्ल्यान गुजरातची मदली आनी निमणी फळी कोसळ्ळी. राहुल तेवतियाक (30) यश ठाकुरान कॅच आवट केल्या उपरांत 18.5 ओव्हरींत गुजराताचो डाव 130 धांवड्यांत सोपलो. य़श ठाकूर (5 विकेटी) आनी कुणाल पंड्या (3 विकेटी) हांणी लखनौक हें अशक्य दिसतालें तें जैत मेळोवन दिलें.
मार्कुस स्टोयनिसाचो अर्द शेंकडो आनी ताणे कॅप्टन केएल राहुल आनी निकोल पुरन हांच्या वांगडा केल्ल्या दोन म्हत्वांच्या भागिदारींक लागून आयपीएलाच्या 21वे मॅचींत लखनौ सुपर जायन्टसांक 20 ओव्हरींत 5 आवट 163 धांवड्यो करप शक्य जालें. क्लिंटन डीकॉक आनी देवदत्त पड्डिकल 18 धांवड्यो जाय मेरेन आवट जातगीर स्टोयनिसान केएल राहुला वांगडा तिसरे विकेटी खातीर 73 धांवड्यांची आनी उपरांत चवथे विकेटी खातीर पुरना वांगडा 21 धांवड्यांची भागिदारी केली. संघाक 114 धांवड्यो करून दिवन दर्शन नालखंडेच्या बॉलार स्टायनिस कॅच आवट जालो. ताणे 4 चौके आनी 2 सक्यांनी 43 बॉलांत 58 धांवड्यो केल्यो. कॅप्टनाची खेळी करतना केएल राहुलान 31 बॉलांत संयती 33 धांवड्यो केल्यो. आयुष्य बदोनी (20) वांगडा पांचवे विकेटी खातीर 31 धांवड्यांची भागिदारी करपी पुरण 3 सक्यांनी 22 बॉलांत 32 धांवड्यो करून नाबाद रावलो. कुणाल पंड्यान दोन धांवड्यो केल्यो. गुजरात टायटन्साच्या उमेश यादव आनी दर्शन नलखंडेन दरेकी दोन विकेटी घेतल्यो. रशिद खानाक आयुष्य बदोनीची विकेट मेळ्ळी.
सुरवेच्या पांच ओव्हरींत ओव्हरींत 47 धांवड्यो करून साई सुदर्शन आनी कॅप्टन शुभमन गिलान गुजराताक सुरवेक सावन मॅचीचेर वर्चस्व मेळोवन दिलें. ह्या वेळार साई सुदर्शनान 4 चौक्यांनी 17 बॉलांत 28 धांवड्यो केल्लो. मात पंगडाच्या 54 धांवड्याचेर शुभमन गील (19) आनी 56 धांवड्यांचेर केन विलियमसन (1) हांकां आवट करून यश ठाकूर आनी रवी बिष्णोय हांणी मॅचीचो समतोल परत जाग्यार हाडलो. कुणाल पांड्येन रवी विष्णोय हाचे वरवीं साई सुदर्शनाक कॅच आवट करून उपरांत रोखडेंच आयुष्य बदोनी वरवीं सिद्धार्थ बीआराक कॅच आवट मॅच लखनौच्या आवाक्यांत हाडली. ह्या वेळार गुजराताची स्थिती 1 आवट 54 वयल्यान 4 आवट 61 अशी स्थिती जाल्ली दिसली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.