गुजराता मुखार सवकाश सुरवात करपी बॅट्समनांची समस्या

भांगरभूंय | प्रतिनिधी

इंडीयन प्रिमीयर लिगेंत (आयपीएल) आयज येजमान गुजरात टायटन्स आनी दिल्ली कॅपिटल्स ह्या पंगडां मदीं मॅच जातली. तांचे मदीं फकत तिनूच मॅची जाल्यात. दोन गुजरातान जाल्यार एक दिल्लीन जिखल्या. अंदूंच्या हंगामांत गुजरातान सतल्यो तीन मॅची जिखल्यात, जाल्यार दिल्लीन स मॅचींतल्यो फकत दोन जिखल्यात. दिल्लीक फाटल्या दोन मॅचींनी सेगीत हार घेवची पडल्या. ताका लागून जैताची गाडी रुळार हाडपाचो ताचो यत्न आसतलो.

गुजराता कडेन चडशे अशे बॅट्समन आसात जांची खेळपाची शैळी एकसारकी आसा. चडशे बॅट्समन सवकाश सुरवात करतात आनी 20 परस चड बॉल खेळ्ळ्या उपरांत आक्रमकाक सुरवात करतात. पयल्या 10 बॉलांचो विचार केलो जाल्यार केन विलियम्सनाची 69.8 स्ट्रायक रेट, डॅव्हिड मिलराची 117, शुभमन गिलाची 120 आनी साई सुदर्शनाची 124 स्ट्रायक रेट आसा. फकत राहुल तेवतियाच (135) जलद सुरवात करता. 21 परस चड बॉल खेळून लेगीत विलियम्सनाची स्ट्रायक रेट 126 इतकीच उरता. पूण, मिलराची 211, गिलाची 162, सुदर्शनाची 154 इतकी स्ट्रायक रेट जाता. तेवतियाची स्ट्रायक रेट 227चेर पावता.

डॅथ ओव्हरींनी दोनूय पंगडांची बॉलींग सामकी वेगळी आसा. दिल्ली कॅपिटल्सान अंदूंच्या हंगामांत 16-20 ओव्हरी मदीं सगल्यांत चड 13.8 प्रती ओव्हरींनी धांवड्यो दिता. जाल्यार गुजरातान निमाण्या पांच ओव्हरींनी फकत 9.92 प्रती ओव्हरींनी धांवड्यो दिल्यात. दिल्ली कॅपिटल्साक डॅथ ओव्हरींनी फकत 9 विकेटी मेळ्ळ्यात. जाल्यार गुजरातान 14 विकेटी घेतल्यात. 2022त गुजरातान डॅथ ओव्हरींनी सगल्यांत चड 101 विकेटी घेतिल्ल्यो. दिल्ली कॅपिटल्सान 71 विकेटी घेतिल्ल्यो.

राशीद खानान आपली वेगळीच वळख निर्माण केल्या. गुजराताचो वांगडी जाल्या उपरांत ताची भुमिका लेगीत बदल्ल्या. 2022 सावन राशीदाचो उपेग निमाण्या ओव्हरींनी चड जावपाक लागला. 2022त राशीदान 16-20 ओव्हरीं मदीं 29 विकेटी घेतल्यात. डॅथ ओव्हरींनी सगल्यांत चड विकेटी घेवपी दुसरो बॉलर थारला. ताच्या मुखार युजवेंद्र चहल आसा. ताणें 32 विकेटी घेतिल्ल्यो. चहलान इकॉनोमी 8.42 आशिल्ली, जाल्यार राशीदान फकत 7.75 चे इकॉनोमीन धांवड्यो दिल्यात. 2022त राशीद आनी चहल हांचे खेरीत खंयच्या स्पिनरान डॅथ ओव्हरींनी मेळयिल्ल्यो सगल्यांत चड विकेटी 10 आशिल्ल्यो.