भांगरभूंय | प्रतिनिधी
इंडीयन प्रिमीयर लिगेंतली (आयपीएल) आयज 7वी मॅच सध्याचो वस्ताद चेन्नय सुपरकिंग्स आनी गुजरात टायटन्स ह्या पंगडां मदीं हांगाच्या चेपॉक स्टेडियमाचेर जातली. दोनूय पंगडांनी अंदूंच्या हंगामाची सुरवात जैतान केल्या आनी दोनूय पंगडांची नदर दुसऱ्या जैताचेर आसतली.
दोनूय पंगडां मदीं आयपीएलाच्या इतिहासांत वट्ट पांच मॅची जाल्यात. हातूंतल्यो तीन मॅची गुजरात टायटन्सान जाल्यार दोन मॅची चेन्नय सुपरकिंग्सान जिखल्यात. पूण, गुजरात टायटन्सान तीन मॅची जिखल्या आसल्यो. करी, चेन्नय सुपरकिंग्सान दोनूय जैतां म्हत्वाचा मॅचींनी म्हणल्यार क्वॉलिफायर आनी फायनलींत जोडल्यां.
फाटल्या हंगामाचे सुरवाती सावन चेन्नय सुपरकिंग्सान पावरप्लेंत उत्कृश्ट खेळ केला. ताणें पोरूं पावरप्लेंत फकत 10 विकेटी वगडायल्यात आनी 9.42चे रन रेटीन धांवड्यो केल्यात. सुमार 91 धांवड्यां उपरांत ताणें विकेट वगडायल्या. हें आंकडे चेन्नय सुपरकिंग्साक हेर पंगडां परस वेगळो करता.
दुसरे वटेन गुजरात टायटन्साच्या फास्ट बॉलरांनी पोरूं पावरप्लेंत 25 विकेटी घेतल्यात. खंयच्याय पंगडान पावरप्लेंत घेतिल्ल्यो ह्यो सगल्यांत चड विकेटी आसात. अंदूं गुजरातान पावर प्लेंत दोन विकेटी घेतल्यात.
2022 सावन आयपीएलांत खेळपी गुजरात टायटन्स अजून मेरेन निमाण्या पांच ओव्हरींनी बरी बॉलींग घालपी येसस्वी पंगड आसा. ताणें डॅथ ओव्हरींनी अजून मेरेन 91 विकेटी घेतल्यात. ताच्या उपरांत डॅथ ओव्हरींनी सगल्यांत चड विकेटी घेवपी लखनौ सुपर जायण्ट्साचो (78) क्रमांक लागता.
गुजराताचो लेग स्पिनर राशीद खान डॅथ ओव्हरींनी उत्कृश्ट प्रदर्शन करीत आसा. तशेंच सुरवातीक लेगीत तो बॉलींग करता. 2022 सावन राशीद 16 ते 20 ह्या ओव्हरी मदीं 24 डावांनी जोड रितीन सगल्यांत चड 18 विकेटी मेळयल्यात. पूण, ऋतुराज गायकवाडाक बॉलींग करतना राशीद खानाक समस्या उप्रासल्या.
ऋतुराज गायकवाडान राशीद खाना आड सात डावांनी 60 बॉलांनी 95 धांवड्यो केल्यात. आयपीएलांत राशीदा आड सगल्यांत चड धांवड्यो करपाचे वळेरेंत ऋतुराज दुसरे सुवातेर आसा.
2022 सावन गुजरात टायटन्सान 191 कॅची धरल्यात आनी 29 कॅची सोडल्यात. अशे तरेन ताची टक्केवारी 87 इतली आसा. ही टक्केवारी हेर पंगडां परस चड आसा.
चेन्नय सुपरकिंग्सा विशीं सांगचें जाल्यार 2022 सावन आतां मेरेन सगल्यांत चड कॅची धरपाचे वळेरेंत सवे सुवातेर आसा. चेन्नय सुपरकिंग्सान ह्या कालावधीत 160 कॅची धरल्यात आनी 39 कॅची सोडल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
