भांगरभूंय | प्रतिनिधी
पणजी, बातमीदार : नवसारी- गुजरातच्या थळाव्या गुन्यांव फांट्यान ५०.४० लाखांच्या सोरो तस्करी प्रकरणांत गोंयच्या डिस्टीलरीच्या संचालका सयत वायन शॉपच्या धनयाक अटक केली. ट्रकांतल्यान व्हरपी हो सोरो ९ मार्चाक नवसारी लागसारा स्टेट मॉनिटरिंग सेलान जप्त केल्ली.
मजगतीं, मंगळारा १९ मार्चाक गुजरात एलसीबीच्या गुप्तचरांनी गोंयच्या सोर्याच्या दुकानाचे धनी फ्रान्सिस डायगो, मायकल डिसूझा तशेंच एक डिस्टीलरीचो संचालक मनीष मिश्रा हांकां अटक केल्ली. सध्या तांकां २६ मार्च मेरेन पुलीस बंदखण आयकयल्या. तशेंच गोंयच्यान पंचमहाल मेरेन सोर्याची तस्करी करपी विक्रम भिल्ल ह्या ट्रक चालकाकूय अटक केल्या.
हे विशीं चड म्हायती प्रमाण, सुरवातेक सोर्याच्या शॉप मालक डिसूझा हांणी डिस्टीलरी संचालक मिश्रा हांचे कडल्यान माल विकतो घेतलो. उपरांत हो माल राजस्थानांतल्या सुरेश बिष्णोय हाका विकलो. फुडें बिष्णोय हांणी गोध्राच्या रमेश वनकार हांच्या ट्रकांतल्यान हो माल धाडलो. मजगतीं, गुप्त माहितीच्या आदारान गुजरातच्या स्टेट मॉनिटरिंग सेलाच्या पंगडान हो ट्रक धरलो आनी धनया सकट माल जप्त केलो.
ह्या ट्रकांत सांपिडल्ल्यो बाटल्यो ‘रॉयल ब्लू’ ह्या ब्रँडच्यो आशिल्ल्यो. स्टेट मॉनिटरिंग सेलच्या छाप्या उपरांत नवसारी गांवच्या पुलीस स्टेशनांत एफआयआर दाखल केली आनी तपासाची जापसालदारकी थळाव्या गुन्यांव फांट्या कडेन दिली. फुडें ट्रकाची चवकशी केली तेन्ना बिष्णोय हांणी गोध्राच्या रामपुरा गांवांत डिलिव्हरी खातीर ही खेप फ्रान्सीस आनी मिश्रा हांचे वरवीं मागयल्ली अशें कळून आयलें. अटक केल्ले वायनशॉप धनी नावेलीचे आनी ताचीं स्वताचीं चार वायन शॉपां आसात.जाल्यार मिश्रा हे साळगांवां रावतात. ते ‘रॉयल ब्लु’ ह्या नांवान डिस्टीलरी चलयतात.
पुलिसां कडेन आशिल्ले म्हायती प्रमाण, ही डिस्टिलरी खास गुजरात आनी आंध्र प्रदेशा खातीर सोरो करता. आतां मिश्रा आनी फ्रान्सीस हांणी गुजरातांत आदींय तस्करी केल्ली काय हे जाणून घेवपाक गुजरातच्या थळाव्या गुन्यांव फांट्याचे अधिकारी मिश्रा हांचे डिस्टिलरीक भेट दितले. गुन्यांव फांट्याचे अधिकारी हे विशीं फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
