गुगलाच्या मॅपाचो असोय एक ‘अलर्ट’…..
भांगरभूंय | प्रतिनिधी
पणजी, बातमीदार ः गोंयांतल्या मिरामार दर्यादेगेचें नांव गुगल मॅपाचेर ‘बिगडी बालम बीच’ दिल्ल्यान फाटल्या दिसांनी हे विशीं बरीच चर्चा जाल्ली. आतां परतून दक्षीण गोंयांतल्या कांय गांवांचीं नांवां गुगल मॅपाचेर चुकीचीं दिल्यांत अशें दिसून आयलां. एका सुवातेर तर एक विचित्र ‘अलर्ट’ दिला. कुंडय- मडकय सर्कल लागसार ‘हांगा पुलिस आसता’ (Hanga police asta) अशें गुगल मॅपाचेर सांगता. हें विशीं सध्या सोशल मिडियाचेरुय बरीच चर्चा चालू आसा.
पोरणें गोंयच्यान फोंड्यांक वतना राष्ट्रीय म्हामार्गाचेर कुंडय उद्देगीक वसणुके लागीं मडकय वटेन एक सर्कल आसा. ह्या सर्कल लागसारची एक सुवात गुगल मॅपाचेर विचित्र ‘हायलायट’ केल्ली आसा. तिचो उल्लेख ‘हांगा पुलीस आसता’ असो केला. कारण हे सुवातेर जायते वेळार पुलीस आसतात. देखून गुगल मॅपान नेमांचे उल्लंघन करपी लोकांक हो अलर्ट दिला कांय?
गोंय हें संवसारीक पर्यटन थळ आशिल्ल्यान देशभरांतल्यान लाखांनी पर्यटक येतात. गोंयांतल्या पर्यटन थळार वतना ते गुगल मॅपाचो खूब उपेग करतात. पूण हांगाच्या थळांचीं नांवां मॅपाचेर विचित्र रितीन दाखयल्ल्यान पर्यटकांक ताचो त्रास जाता. दक्षीण गोंयांतल्या गांवांचीं नांवां सर्च केल्यारुय अशींच चुकीचीं नांवां येतात. हाचेर थळावे लोक सोशल मिडियाचेर गूगल मॅपाचे चित्र घालून आपली नाराजी उक्तायतात.
हीं नांवां गोंयकारांनीच दिल्यांत आसुयें, अशें कांय जाणांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
